Qorǵanys kesheni nyǵaıa túsedi

Jýyrda Ortalyq kommýnıkasııalar qyzmetinde ótken brıfıngte Qorǵanys mınıstriniń orynbasary, general-leıtenant Sultan Kamaletdınov Qarý­ly Kúshterdiń ótken jylǵy qyz­­metin qorytyndylady. Onyń aı­týynsha, ótken jyldyń mańyz­­dy oqıǵasy – Qarýly kúsh­­terdiń Joǵarǵy Bas qol­bas­shysy Qasym-Jomart Toqaev­tyń tóra­ǵalyǵymen ótken búkilar­mııalyq keńes.

«Prezıdenttiń basshyly­ǵymen ótken «Batyl toıtarys» stra­tegııalyq komandalyq-shtab­tyq oqý-jattyǵýy áskerlerdiń jaýyngerlik daıyndyǵynyń sheshýshi kezeńi boldy. Qarýly Kúshter tarıhynda tuńǵysh ret Joǵarǵy Bas qolbasshylyq­tyń, soǵys ýaqytyndaǵy Úkimet pen oblystardyń qorǵanys keńes­teriniń ekonomıkalyq qyzmet­ti jáne halyqtyń ómirlik qajettilikterin qamtamasyz etý jónindegi stavkasyn óristetý máseleleri pysyqtaldy», dep atap ótti mınıstrdiń orynbasary. Onyń aıtýynsha, elimizdiń Qarýly Kúshteri bólimsheleri jeke quramynyń dalalyq bilimin arttyrý jáne jaýyngerlik úı­lestirý maqsatynda myńǵa jýyq oqý-jattyǵý, jaýyngerlik mashınalardy júrgizý boıynsha 16 myńnan astam sabaq, 40 myń­nan astam jaýyngerlik atys ótken. Bunymen qosa ol elimizde 6 halyqaralyq oqý-jattyǵý ót­kizilgenin jáne bizdiń áskerı qyz­metshilerimiz basqa elderdiń aýmaǵynda ótken 24 oqý-jattyǵý men jarysqa qatysqanyn aıtty.

Memleket basshysynyń tapsyrmasyn oryndaý maqsatymen bitimgerlik qyzmettiń geografııasy keńeıtildi. Qazaq­stan­ kon­tıngentiniń Lıvandaǵy BUU mıs­sııasynda, Batys Sahara­da­ǵy, Ortalyq Afrıka Res­pýblı­kasyn­daǵy jáne Kongodaǵy shtab ofıserleriniń rotasııalary júr­gizildi. Ulttyq kontıngentti kele­si jyly Golan bıiktiginde «BUU-nyń bólinýdi baqylaý kúshteri» mıssııasyna jiberý boıynsha jumystar atqarylyp jatyr.

Prezıdenttiń Jarlyǵymen Qarýly Kúshterdiń, basqa da áskerler men áskerı quralymdar­dyń qyzmetshileri úshin biryńǵaı dalalyq kıim nysany engizildi. Jańa úlgidegi dalalyq kıim-keshekke 2024 jyldyń tórtinshi toqsanynda, qalǵan nysandy kıimderge úsh jyl ishinde kóshý josparlanǵan.

Áskerı mindettiler men ás­kerge shaqyrylýshylardyń ese­bi sıfrlyq formatqa aýys­ty­ryldy. Áskerı mindetti­liktiń mártebesi jáne áskerı esepke alý týraly derekter eGov paı­dalanýshysynyń jeke kabıne­tinde kórsetiledi. 

«Merzimdi áskerı qyzmettiń bedelin arttyrý maqsatynda zapasqa shyǵarylǵan sarbazdarǵa joǵary oqý oryndarynan úsh myń tegin oryn bólindi. Ekin­shi deńgeıdegi banktermen sar­bazdarǵa «nesıelik kanıkýl» berý týraly másele pysyq­taldy. Búgingi tańda merzimdi qyzmettegi 5 myńnan astam áske­rı qyzmetshiniń nesıe boıyn­sha 1 mlrd 875 mln teńge bere­shegi keıinge qaldyryldy. Qyz­met ótkergen azamattar úshin bilim berý jeńildikteri de qolda­nylady», dedi spıker.

Úkimet qaýlysymen jas­tar­dy 2030 jylǵa deıin áske­rı-patrıottyq tárbıeleý tujy­rym­damasy bekitildi. Bú­gin­gi tań­da elimizde segiz myń­nan astam áskerı-patrıottyq klýb, «Jas sarbaz» synyptary jáne «Smart sarbaz» úıirmeleri jumys isteı­di. Oǵan 280 myńnan astam bala men jasóspirim tartylǵan.

Mınıstrdiń orynbasary bıyl qorǵanys vedomstvosynyń kúsh-jigeri Ar­naıy operasııa­lar kúshteri men aýmaqtyq ás­kerlerdi damytýǵa, áske­rı-oqy­tylǵan rezervtiń úle­sin ul­ǵaı­týǵa, armııanyń utqyr múm­kin­dikterin keńeıtýge, vedom­stvo­aralyq úılestirýdi jaqsar­týǵa, armııany josparly qaıta ja­raq­tandyrýǵa jáne otandyq Qor­ǵanys-ónerkásip keshenin da­my­týǵa baǵyttalatynyn atap ótti.