Qańtar týa Shyǵysta qys qaharyna mindi. Qar basty, borandatty, artynsha keıbir óńirlerde jańbyr jaýyp, joldar kóktaıǵaqqa aınaldy. Saldarynan bolsa kerek, jol kólik oqıǵalary oryn aldy. Adam shyǵyny da joq emes. Sondyqtan da, tótenshe jaǵdaılar departamenti aldyn ala eskertý jumystaryn júıeli túrde júrgizip otyr.
Ásirese О́skemen – Tarǵyn – Samar jáne О́skemen – Rahman qaınary tas joldary jıi jabylady. Taý arasy bolǵan soń daǵy qasat qar alyp qalady, kóshkin túsedi taǵysyn-taǵy. Sońǵy eki-úsh kúnde Altaı, Samar óńirlerinde qar ádettegi normadan qalyń túsip, turǵyndardy ábigerge salǵany da bar. Jolǵa shyqqany bylaı tursyn, aýladan attap basa almaı qalǵan. Samardyń ózinde qardyń qalyńdyǵy 50 santımetrden assa, keı aýyldyq okrýgterde bir metrge jýyqtaǵan. Bul – TJD mamandarynyń bergen málimeti. Aıta keteıik, eki kún ishindegi qardyń normadan asyp ketkenin eskergen aýdan basshylyǵy birden kóktemgi sý tasqynyna daıyndyq jumystaryn da pysyqtap úlgergen. Al aýyl turǵyndary bir-birine qolushyn berisip, aýla men kóshelerdi qardan tazartty.
– Bıyl qys jaı bastalǵanymen, birneshe kún qar jaýyp, aýyldy tyrp etkizbedi. Qar byltyrǵydan qalyń. Onyń ústine aýyr. Kún jyly. Erip jaýdy. Byltyr sýyq bolatyn. Qystyń aıaǵy uzaryp ketpese ıgi edi, – deıdi Samar aýylynyń turǵyny Ernazar Saýyq.
Qalyń qardaǵy halyqtyń jaǵdaıyn aýdan ákimi Nurlan Muhtaruly óziniń jiti nazarynda ustady. Búkil okrýg ákimderi, tótenshe jaǵdaılar bólimi, polısııa bólimderi táýlik boıy qyzmet etti.
Dál mundaı qar Altaı aýdanynda da túsken. Qala men dalany tehnıkalar kún-túni qardan arshyp tynym tappaǵan. Aýdan ákimi Renat Qurmanbaev áleýmettik jeli arqyly turǵyndarǵa tikeleı aqparat taratyp, otyrdy. Aıtýynsha, qala ishine 20 shaqty tehnıka jumyldyrylǵan.
– Qalany ýaqtyly qardan tazartyp aldyq. Turǵyndarǵa degen endigi ótinishimiz, árkim óz úıiniń shatyrdaǵy qaryn túsirip otyrsa eken. Áıtpese podezden shyǵyp bara jatqan qala turǵynyna qar qulap ketken. Abyroı bolǵanda, aman-saý. Erteńgi kúni qaıǵyly jaǵdaı bolmaýy úshin qaýipsizdik sharalaryn búgin jasaýymyz kerek, – dep eskertti Altaı aýdanynyń ákimi Renat Qurmanbaev.
Ras, neshe kún tolassyz jaýǵan qalyń qar aýdan jurtyn ábden tıtyqtatty. Qardy tazalaǵany sol edi, 10 qańtar kúni oblys ortalyǵy men keıbir aýdandarda jańbyr jaýyp, kósheler kók muzǵa aınaldy. Osy oraıda oblysty polısııa men tótenshe jaǵdaılar departamenti mamandary turǵyndar men jolaýshylarǵa jolǵa shyqqanda barynsha abaı bolý kerektigin eskertýmen boldy. Sonyń ózinde jol-kólik oqıǵalary oryn alǵan. Altaı men О́skemen arasyndaǵy tas jolda jeńil avtokólik pen shaǵyn avtobýs soqtyǵysyp, bir adam kóz jumǵan. Onyń aldy 2 qańtarda О́skemen–Glýbokoe baǵytyndaǵy jolda eki jeńil kólik soqtyǵysyp, tórt adam mert bolǵan. Árıne, oǵan borannyń tikeleı qatysy joq ta shyǵar, dese de júrgizýshiler qystyń kúni asa abaı bolǵandary jón. Eskertýi, eskertedi ǵoı. Oǵan qulaq aspastan asyǵys jolǵa shyǵyp ketip jatqan jolaýshylar qanshama? Máselen, 2 qańtar kúni Samar aýdandyq polısııa bólimine Samar – О́skemen tas jolynda birneshe kóliktiń turyp qalǵany týraly habarlama kelip túsken. Keshten bastap óńirde jol ýchaskesin jabý týraly sheshim qabyldanǵanymen, júrgizýshiler kún raıynyń qolaısyzdyǵyna jáne eskertýge qaramastan, aýyldan shamamen 40 shaqyrymdaı uzap baryp, qar qursaýyna qamalǵan. Oqıǵa ornyna jetken polısııa qyzmetkerleri olardy evakýasııalaýǵa kómek kórsetken. Barlyǵy 11 adam qar qursaýynan qutqarylyp, Samar aýylyna jetkizilgen. Onyń ishinde kámeletke tolmaǵan eki bala bar.
Polısııa departamenti aýa raıynyń nasharlaýy kezinde joldardaǵy jaǵdaı halyqqa sms-habarlamalar, sondaı-aq áleýmettik jeliler arqyly aldyn ala habarlanatynyn eske salady. Sonymen qatar júrgizýshilerge tas joldar jabylǵan kezdegi polısııa qyzmetkerleriniń zańdy talaptaryna baǵynbasa, ákimshilik jaýapkershilik kózdelgen.
Shyǵys Qazaqstan oblysy