Májilistiń jalpy otyrysynda depýtat Maqsat Tolyqbaı Premer-mınıstrdiń orynbasary Serik Jumanǵarınge jáne Bas prokýror Berik Asylovqa depýtattyq saýal joldap, jaıylym jaıyn qozǵady, dep habarlaıdy Egemen.kz tómengi Palatanyń baspasóz qyzmetine silteme jasap.
«Taý jaratylystyń jarty bólshegi deımiz. Biraq el-aman jurt tynyshta bir taýdyń ózin menshiktep alypty degendi estidińizder me? Úshqońyr taýyn bári biledi. Tumsa tabıǵaty keremet sol taý búginde saı-salasymen qosa bir azamattyń ǵana jeke menshiginde. Almaty oblysyndaǵy Úshqońyr ústirtine barar jolǵa blok-beket qoıylǵan, bastan aıaǵyna deıin qaýyrlanǵan top kúzetedi. Sol taýdy kózimmen kórip, etegindegi elmen etene tildesken soń depýtattyq saýal joldap otyrmyn. Birinshiden, bul taý «Ile Alataýy ulttyq parkine» qaraıtyndaqtan, parktiń kúzetshileri qaraýyl bolmaı ma? Álde bul taý «Dúnıe agro» kompanııasyna atasynan mura bolyp qalǵan ba? Jan balasyn jýytpaı aınalasyn qorshap, muzdaý qarýlanǵan kúzet qoıý – baryp turǵan bassyzdyq», dedi depýtat.
Qarasaı aýdanynyń turǵyndary óz jerine maldaryn jaıa almaı pushaıman kúıge túskenin aıtty. Májilis depýtaty «Amanat» partııasynyń jer tapshylyǵyn sheshý úshin qurylǵan «Jer amanaty» komıssııasynyń tikeleı aralasýymen respýblıka boıynsha 9 mıllıon gektardan asa jer qaıtarylǵanyn, ony ishinde Qarasaı aýdanynan 1400 gektar jaıylym el ıgiligine berilgenin atap ótti. Biraq elge qajetti jaıylymnyń shuraıly jeriniń barlyǵy da qorshaýdyń ishinde qalyp qoıǵanyn jetkizdi.
«Osylaısha jurt óz jerine kirmek túgili, jańaǵy qarýly beketten ótýge dáti jetpeıdi. Soraqysy «Dúnıe agro» JShS-ne 2004 jyly Úshqońyr ústirtinde ornalasqan 100 gektar jerge menshik quqyǵy zańsyz berilgen. Zań talaptary boıynsha arnaıy maqsattaǵy jerlerdi zańdy tulǵalardyń jekeshelep alýyna quqy joq. Bul normalardy jergilikti prokýratýra jaqsy biledi. Biraq jerdiń zańsyz berilý faktisi boıynsha prokýratýranyń talaptaryn sot qanaǵattandyrmaı tastaǵan. Sonda QR zańyna shekesinen qaraıtyn bul neǵylǵan shekten shyǵý degen halyqtyń bazynasyna ne aıtamyz?», dedi depýtat.
Úshqońyr ústirtinde birneshe kompanııa 13 597 gektar jerdi áli kúnge deıin maqsatsyz paıdalanyp otyrǵany anyqtaldy. Alaıda alpaýyttarmen alysýǵa jergilikti ákimdik, aýdan prokýrorlarynyń pármeni jetpeı dármeni qurıma degen kúdigi basym ekenin aıtty.
Osyǵan Úkimet, Bas prokýratýra basa nazar aýdaryp, arnaıy komıssııa quryp, máselege tıisti quqyqtyq baǵa berýi tıis ekenin eskertti. Prezıdenttiń el ıgiligine qaıtarylýy qajet jaıylymdyq jerler boıynsha tapsyrmasyn naqty oryndaý mańyzdy ekenin eske saldy.