Taldyqorǵan qalasyna irgeles ornalasqan saıajaılar men eldi mekenderge kóńil bóline bastady. О́zderin «qalalyqpyz» dep sanaıtyn turǵyndar endi bul sózdi maqtanyshpen aıtsa bolǵandaı. Máselen, Yntymaq aýylyna gaz kelse, Balyqty saıajaıynyń turǵyndary úshin jańa kópir qoldanysqa berildi. Bul – qaladaǵy mektebine asyqqan balalarǵa úlken kómek.
Áýeli Balyqty saıajaıyndaǵy kópirdiń jaıyna toqtalsaq. Buǵan deıin eski kópirden qarasha halyq qorqasoqtap ótetin. Ásirese oblys ortalyǵynda oqıtyn balalary úshin qam jegen ata-analardyń alańy oblys ákimdiginiń de mazasyn ketirdi. Bul túıtkil baspasóz betinde de talaı kóterildi. Jetisýlyqtar qala ákimi Ernat Bázilmen júzdesýde kópirdiń máselesi sheshilmeı kele jatqandyǵyn, kóktem men kúz aılarynda qıyndyq týǵyzyp, erigen qar sýynyń ótkeldi basyp qalatyndyǵyn jetkizgen. Muny jaqsy túısingen qala basshysy bul másele óziniń tikeleı nazarynda ekenin aıtyp, ýáde bergen-di. Budan halyqtyń qýanyshqa keneler sáti alys emes ekendigin ańǵarǵanbyz.
Sóıtip, qala basshysy turǵyndardyń ótinishine beıjaı qaramaı, máseleni eki aıdyń ishinde ońtaıly sheship berdi. Endi saıajaıda eni 4 metr, uzyndyǵy 30 metr bolatyn kópir arqyly esh kedergisiz ótýge múmkindik týyp otyr. Sodan da bolar kópirdiń ashylý saltanatyna halyq kóp jınaldy.
«Biz halyqtyń ótinishin jerge tastamaý úshin sala mamandarymen keńesip, osy ıgilikti dúnıege qol jetkizip otyrmyz. Qalamyzdyń damýy úshin kez kelgen problemany keıinge qaldyrmaý mańyzdy. Shama jetkenshe qala syrtyndaǵy aýyldardy túrlendirýge barymyzdy salamyz. Balalardyń qaýipsiz ómir súrýi ulttyń bolashaǵyn kórkeıtedi. Qýanysh qutty bolsyn», dedi E.Bázil.
Aıta keteıik, kópirdiń osy jolǵy jóndeý jumystaryna 19 mln teńge bólindi. Barlyq talapqa saı, tolyqtaı qaýipsizdik erejeleri saqtalǵan. Turǵyndar men oqýshylar eki ortaǵa erkin qatynaýǵa bolady.
«О́te qýanyshtymyn. Qanshama jyldan beri osy máseleni kóterip keldik. Ákim bergen ýádesinde turyp, kópir jóndeldi. Endi balalarymyz úshin alańdamaımyz. Áıtpese, sabaqtan sál keshikse, mazamyz ketetin. Tipti keıbir ata-analar kópirdiń aldyna shyǵyp kútip alady. Aýyldyq jer bolǵan soń sharýa kóp. Keıde úlgere de almaı qalasyn. Búgin sol ýaıymymyz seıilip, kóńilimiz bir jadyrap qaldy», deıdi saıajaı turǵyny Marat Dúısenbekov.
Jalpy, Taldyqorǵan shahary birtindep kórkeıip keledi. Bizdi qýantatyny burynǵydaı halyqtyń uzaq ýaqyt kómirge kezekke turmaıtyny. Jyldan-jylǵa qala ishinde qara otynǵa suranys azaıyp keledi. Kúni keshe taǵy bir turǵyn úı alabyna tabıǵı gaz jetkizildi. Endi Yntymaqtaǵy eki jarym myń aýlanyń kógildir otynǵa qosylýǵa múmkindigi bar
Memleket basshysy Jetisý oblysyna jasaǵan sapary barysynda Taldyqorǵan qalasyn 2025 jylǵa deıin tabıǵı gazben tolyq qamtamasyz etý týraly tapsyrma bergen bolatyn. Osyǵan oraı, ótken jyly Taldyqorǵan qalasy mańyndaǵy «Úıtas» saıajaıyna, «Jastar-2» aýylyna gaz berildi. Endi mine, jańa jylda «Yntymaq» aýylyna gaz tartylyp otyr.
«Yntymaqta eki jarym myńdaı abonent bar. Búgin osy eldi mekendi gazdandyrdyq. Osyndaı jumystar aldaǵy ýaqytta da jalǵasyp, qala mańyndaǵy 8 saıajaıdy gazdandyrý aıaqtalady. Jalpy, 2025 jyly Taldyqorǵan qalasy gazben tegis qamtamasyz etiledi. Osy baǵytta qazir júıeli jumystar júrip jatyr», deıdi qala ákiminiń orynbasary Qýanysh Baqytuly.
«Yntymaq» turǵyn úı alabyn gazdandyrý jumystaryna 1,4 mlrd teńge jumsalǵan. Qurylysty «MBK Qurylys» JShS 2022 jyldyń sońynda bastaǵan. Búginde 113,5 km gaz jelisi tartyldy. Jyl sońyna deıin áli de jóndeý jumystary jalǵasady.
Qazirgi kezde Taldyqorǵan qalasynda halyqtyń 90 paıyzynyń gazǵa qosylýyna jaǵdaı jasalǵan. Bul rette jalpy sany 54,4 myń abonenttiń 32,5 myńy nemese 59 paıyz kógildir otynnyń ıgiligin kórip otyr. Aldaǵy jyldary aýyl turǵyndary kómirge kezekke turmaıtyn bolady.
Jetisý oblysy