Petropavlda jaza merzimi aıaqtalǵan eki qandyqol qylmysker bostandyqqa shyqqaly otyr. Onyń biri qańtar, ekinshisi sáýir aıynda shyǵady, dep habarlaıdy Egemen.kz.
Valerıı Krıchınevskıı, Aleksandr Lıýtov esimdi eki jaza óteýshiniń qylmystary uqsas. Ekeýi de beımizgil ýaqytta jalǵyz júrgen áıelder men balalardy ańdyp, baltamen uryp-soǵyp, zorlyq kórsetip, tonaýmen aınalysqan. Olardyń qasqóı áreketinen til tartpaı ajal qushqandar da bar.
61 jastaǵy Valerıı Krıchınevskıı aýyr qylmystary úshin 1999 jyly 25 jylǵa bas bostandyǵynan aıyrylsa, 51 jastaǵy Aleksandr Lıýtov 20 jylǵa jazaǵa tartylǵan. A.Lıýtov 2016 jyly 17 jyl otyrǵannan keıin ony shartty merzimmen túrmeden de shyǵarady. Biraq Lıýtov bostandyqqa shyqqannan keıin taǵy qylmysqa barady, 19 jastaǵy boıjetkenge shabýyl jasaǵan. Bul joly sýdıa Mıhaıl Gýsev oǵan bar bolǵany 3 jyl ǵana jaza kesedi. Jasy 50-den jańa ǵana asqan, psıhıkasy kisi óltirýge qumartyp turatyn qaskóı erteń taǵy bireýdiń qanyn moınyna júktemesine kim kepil? Ol bıyl sáýirde bostandyqqa shyqqaly otyr.
Qazir Petropavl turǵyndary ózderiniń, jaqyndarynyń, ásirese balalarynyń ómiri úshin alańdaýly otyr. Oblystyq polısııa departamentiniń basshysy, polkovnık A.Qabyldınov olardy tynyshtandyrýǵa tyrysyp baqty. Onyń aıtýynsha, ýchaskelik polısııa ınspektory da, jedel ýákil de túzeý mekemesinen shyqqandardyń júris-turysyn kózden tasa qylmaıdy.
Aıta keteıik, gazettiń búgingi sanynda Soltústik Qazaqstan oblysy boıynsha menshikti tilshi Jaqsybaı Samrattyń «Qylmysker túrmeden shyqsa...» atty maqalasy jarııalandy. Derekter sol maqaladan alyndy.