Senator Darhan Qydyráli Úkimet basshysyna jáne Bas Prokýrorǵa depýtattyq saýalyn joldap, shetelge ketken jetimderdiń taǵdyry týraly másele kóterdi. Depýtat atalǵan máseleniń birneshe ret kóterilgenin, prokýratýra tarapynan jaǵdaıdy retteý áreketteri bolǵanyn, biraq, tekseris nátıjesi beımálim ekenin aıtty, dep habarlaıdy Egemen.kz.
«20 jyl buryn jattyń jetegine ketken jetim balalar eseıdi, sondyqtan bul taqyryp taǵy kóterilip keledi. Mysaly jýrnalıst Janar Baısemizova júrgizetin «Sheteldegi qazaq balalary» jobasyn tebirenbeı kórý múmkin emes. Ata-anasyn tapqysy keletinder az emes. Solardyń biri - belgııalyq asyrap alǵan Jánibek Jumaǵulov, mundaı taǵdyrlar qanshama», dedi depýtat.
Qazaqstan shetel azamattary asyrap alǵan balalardyń quqyqtaryn qorǵaý maqsatynda 2010 jyly «Balalardy qorǵaý jáne balany sheteldik asyrap alýǵa qatysty yntymaqtastyq týraly Konvensııany» ratıfıkasııalaǵan. Bala quqyqtaryn qorǵaý salasyndaǵy ýákiletti organ bolyp sanalatyn Oqý-aǵartý mınıstrliginiń málimetinshe, Konvensııaǵa qol qoıǵaly beri sheteldik azamattar Qazaqstannan 158 bala asyrap alǵan. Sonyń ishinde 2013-2019 jyldary 157 bala shetel assa, sońǵy 4 jylda 1 bala syrtqa shyqqan. Konvensııaǵa qol qoıǵanǵa deıin, 1999-2011 jyldar aralyǵynda sheteldikter 8 myń 805 bala asyrap alǵan. Olardyń 5 myń 217-si qazir kámelettik jasqa tolǵandyqtan esepten shyǵarylǵan. Kámeletke tolmaǵan 3 588 bala týraly málimet-esep alynyp turady.
«О́kinishke qaraı esep bermeıtinder de kóp. Máselen, Ońtústik Afrıka eline ketken 30 baladan habar-oshar joq. Sol sııaqty AQSh-taǵy 104, Belgııadaǵy 113, t.s. balanyń taǵdyryn bilmeımiz. Eń soraqysy, 1999 jylǵa deıin elimizden qansha jetim balanyń shetelge ketkeni týraly múldem málimet joq», dedi senat depýtaty.
Depýtat 1999 jylǵa deıin shetelge ketken jetimder týraly derekter boıynsha zertteý júrgizý, jalpy, balalar týraly málimetterdi jańalaý, balalarǵa bıologııalyq ata-anasyn tabýǵa kómektesý, sondaı-aq olardyń qalaýy boıynsha elimizdiń azamattyǵyn alýǵa járdemdesýdi usyndy.