AQSh-tyń jergilikti ýaqyty boıynsha 16:49-da (Túrkııa ýaqyty boıynsha 00:49) tuńǵysh túrik astronavty Alper Gezeravjy mingen SpaceX ǵarysh kemesi NASA-nyń Florıdadaǵy Kennedı ǵarysh ortalyǵynan sátti ushyryldy, dep habarlaıdy Egemen.kz Anadoly agenttigine silteme jasap.
Ax-3 mıssııasynyń múshesi Gezeravjy ǵarysh saparyn AQSh-tyń Florıda shtatyndaǵy Kennedı ǵarysh ortalyǵyndaǵy 39A ushyrý kesheninen bastady. Halyqaralyq ǵarysh stansııasyna (HǴS) aparatyn Falcon 9 zymyrany jergilikti ýaqyt boıynsha saǵat 16.49-da (Túrkııa ýaqytymen 00.49) ushyryldy.
Zymyran bortynda Italııa, Túrkııa, Shvesııa ǵaryshkerleri bar. Olar Halyqaralyq ǵarysh stansııasynda bıologııa, medısına, genetıka salalary boıynsha birqatar ǵylymı tájirıbe júrgizedi.
Mıssııa komandıri − NASA-nyń burynǵy astronavty jáne qazirgi Axiom bas astronavty Maıkl Lopes-Alegrııa. Mıssııanyń ushqyshy retinde Italııa áýe kúshteriniń ofıseri Ýolter Vılladeı tańdalǵan. Bul quramǵa Túrkııanyń tuńǵysh ǵaryshkeri Alper Gezeravjy men Eýropa ǵarysh agenttiginiń (ESA) astronavty shvesııalyq Markýs Vandt ta kirdi. Olar Halyqaralyq ǵarysh stansııasynda 2 apta bolady. Ár ǵaryshker HǴS bortynda ózderiniń ulttyq múddeleri úshin ǵylymı zertteýler júrgizedi.
Áýelde laıner 18 qańtarǵa qaraǵan túni ushyrylýy kerek bolatyn. Keıinirek ushý ýaqyty ózgerdi. SpaceX kompanııasynyń málimetinshe, kemedegi tekserýler men derekterdi qosymsha taldaý úshin qosymsha ýaqyt qajet bolǵan.