Jańaózen qalasynda Ulttyq ulannyń «Batys» óńirlik qolbasshylyǵyna qarasty áskerı bólimder arasynda voleıboldan jarys uıymdastyryldy.
Sporttyq básekede Atyraý, Aqtóbe, Aqtaý Oral jáne Jańaózen qalalarynan kelgen 6 komanda – barlyǵy 60-qa tarta sportshy baq synady.
Sporttyq jarystyń ashylý saltanatynda 5548 áskerı bóliminiń komandıri, podpolkovnık Sanat Tábetov sóz sóılep, áskerı qyzmetshilerdiń arasynda sportshylardyń sheberligin shyńdaý óte mańyzdy ekenin aıtty. Sonymen qatar qatysýshylarǵa sáttilik tilep, sportpen turaqty aınalysyp, salamatty ómir saltyn ornyqtyrýdyń mańyzyn atap kórsetti.
Oıyn alańyna áýeli Oral qalasynyń 5517 áskerı bóliminiń komandasy men Jańaózen qalasynyń 5548 áskerı bóliminiń voleıbolshylary shyqty. Alǵashqy mınýttan-aq oraldyqtar shabýyldy údetip, esepti eselep aldy. Jańaózendikter de qarap qalmady, keshikpeı oıyn tizginin qolyna alyp, esepti teńestire bildi. Oıynnyń aıaqtalýyna sanaýly mınýt qalǵanda Oral komandasynyń aıy ońynan týyp, jeńiske jetti.
Jarysqa qatysýshylardyń bári de barynsha sheberlik kórsetip, óz komandasy úshin aıanyp qalmady. Eki kúnge sozylǵan tartysty saıystyń qorytyndysy boıynsha Oral qalasynyń 5517 áskerı bóliminiń komandasy birinshi orynǵa qol jetkizdi. Ekinshi oryndy Aqtaý qalasynan kelgen 6656 áskerı bóliminiń oıynshylary ıelendi. Al úshinshi oryn alań ıeleri – 5548 áskerı bóliminiń komandasyna buıyrdy. Jeńimpaz-júldegerler kýbok, gramota, baǵaly syılyqtarmen marapattaldy.
Batys Qazaqstan oblysy