Ildekeń ınternet kelmeı turyp eseıip, erjetkenine ókinse de, balasynyń baǵy janyp, zamany soǵan týra kelgenine táýbe deıdi.
Ásirese doktorlyq dıssertasııasyna kerek maǵlumattardy búge-shigesine deıin taýyp bergen balasyna dán rıza... Keregińdi aıta qal, izdep iz kesedi de, áp sátte aldyńa tastaıdy.
Ildekeń balasy taýyp bergen maǵlumat ataýlyny qıystyryp:
– Atyńnan da, zatyńnan da aınaldym ınternet... Sen bolmaǵanda arhıv kezip júnjip biter edim-aý! – dep rıza keıipte kúbirlep otyr edi, aıaqasty boıjetken qyzy:
– Áke, meni alyp qashyp ketti! – dep jaısyzdaý habardy dúńk etkizgeni.
Ildekeń «Baǵyń ashylsyn!» deı jazdap baryp, «alyp qashqan» degen sózdi qolapaısyzdaý kórdi de: «Qazir, qyzym, habarlasamyn», dep toqtaý aıtyp, bolashaq qudanyń aty-jónin surap aldy da, balasyna:
– Myna kisi jónindegi bar maǵlumatty tezdetip tap! – dep bolashaq qudanyń aty-jónin aldyna tastady.
Internet iz kesip: «Kúzetshi. Keıingi áıelimen páter jaldap turady. Buryndary isti bolyp sottalǵan...» degen mándegi maǵlumat bergen boıda Ildekeń qyzyna:
– Qurtamyn! O zaman da bu zaman, alyp qashty degen ne sumdyq! Kelisim berme! Baramyn da kózderine kók shybyn úımeletemin, túrmege toǵytamyn! – dep toq eterin aıtyp julqyna jolǵa shyqty.
Orta joldan asqanda balasy habarlasyp:
– Áke, baǵanaǵy maǵlumat basqasha bolyp tur, ınternet qatelesipti. Qudańyz sheneýnik eken. Barshylyqtyń ıesi. Internet bolashaq qudańyzdyń záýlim kottedj aldynda túsken sýretin de kórsetip tur, – demesi bar ma.
Bireý Ildekeńniń ústinen muzdaı sý quıyp jibergendeı boldy.
Kóligin kidirtip, aqylǵa kele sabasyna túsip:
– Qyzym, ákeńdi tyńdasań kelisimińdi ber. «О́z erkimmen keldim» dep qolhatyńdy jaz. Barǵan jerińde baǵyń ashylsyn, – dep toq eterin aıtyp keri qaıtty.
Aýlaǵa engeni sol, balasy qolynda noýtbýgi:
– Áke, ápkemnen bolashaq qudańyzdyń aty-jónimen qosa týǵan jylyn surap alyp ınternetten qaıta izdep kórip edim, famılııalary birdeı bolyp shyǵyp, anyǵy – bolashaq qudańyz baǵanaǵy basyndaǵy kisiniń naq ózi eken, – demesi bar ma...
Ildekeńniń ústinen bireý taǵy da muzdaı sý quıyp jibergendeı boldy. Kózi qaraýytyp, aıaǵy táltirektep:
– Atańa nálet, shat-shálekeı ınternet! Túbimizge jettiń, jetkizbeı jelke qıdyrdyń! Bárinen de qyzymnyń qolhat berip qoıǵanyn aıtsańshy! – dep tabaldyryqqa qulap sulq tústi...
Berik SADYR