Sý resýrstary jáne ırrıgasııa mınıstrliginiń qoldaýymen byltyr elimizde 8 gıdrotehnıkalyq nysan memleket menshigine ótti. Naqty ataǵanda Aqtóbe oblysyndaǵy 4 ıesiz qalǵan bóget, sondaı-aq Shyǵys Qazaqstan oblysyndaǵy 3 toǵan jáne 1 sý qoımasy memleket menshigine ótti, dep habarlaıdy Egemen.kz.
Vedomstvonyń baspasóz qyzmetiniń málimetinshe elimizde jalpy sany 22 gıdrotehnıkalyq nysannyń qaraýsyz qalǵany anyqtalǵan. Onyń ishinde 5 nysan qıraǵan ári paıdalanýǵa jaramsyz. Al qalǵan 9 nysandy kommýnaldyq menshikke qabyldaý boıynsha jumys júrip jatyr.
«2023 jyly elimizdiń gıdrotehnıkalyq nysandaryna túgendeý júrgizildi. Odan keıin oblys ákimdikterimen birlesip olardy qalpyna keltirý boıynsha keshendi jospar ázirlendi. Atalǵan jospardy iske asyrý gıdrotehnıkalyq qurylystardyń tozý máselesin sheshýge jáne olardyń qoldanysqa jaramdylyǵyn arttyrýǵa múmkindik beredi», dedi vedomstvo basshysy Nurjan Nurjigitov.