Jyly tósekten jylystap, tátti uıqyny tárk etý kóp adamdar úshin ońaı bolmaýy múmkin. Alaıda tań alageýimnen turyp, taza aýada serýendeý – talaı derttiń taptyrmas emi. Osy bir isti ómirlik daǵdyǵa aınaldyrǵan jannyń táni men jany ushan teńiz paıdaǵa keneledi.
Tańǵy jupardy tamsana jutyp, taza aýada jarty saǵat serýen qurý júrek aýrýynyń aldyn alady. Statıstıkany sóıletsek, jyl saıyn jer sharynda 18 mıllıon adam dál osy derttiń saldarynan ómirmen qosh aıtysatyn kórinedi. Al Qazaqstan tutas TMD ishinde júrek-qan tamyrlary aýrýyna shaldyqqandardyń sany boıynsha kósh bastap tur.
Tańerteńgilik serýen aǵzanyń zat almasýyn qalypqa túsirip, júrek jumysyn jaqsartady. Aǵzadan endorfın, ıaǵnı qýanysh pen lázzat alý garmony men paıdaly aqýyzdar túzilip, júıke júıeleri men mıǵa taraıdy. Sol arqyly boıdaǵy ýaıym men mazasyzdyqtan arylýǵa bolady. Bul óz kezeginde este saqtaý qabiletin jaqsartyp, oı ushqyrlyǵyn da damyta túsedi.
Ǵalymdar tańerteńgi kún sáýlesiniń dene symbaty úshin paıdaly ekenin áldeqashan dáleldegen. Táýliktiń alǵashqy bóliginde denege taraǵan kún sáýlesi táýliktiń ekinshi bóligindegi kún sáýlesine qaraǵanda aǵzadaǵy metabolızmdi jaqsartýǵa beıim. Ásirese shyǵarmashylyq adamdary úshin tańǵy serýen – naǵyz shabyt syılaıtyn erekshe sát.
– Taza aýada jattyǵý men serýen bizdiń rýhanı ómirimiz úshin asa mańyzdy. Syrtqy saýyty men ishki jan dúnıesi úılesim tapqanda ǵana adam ózin shynaıy baqytty sezine alady. Kúızeliske ushyraǵan jan erte turyp serýen quryp, jattyǵý jasasa, jańa kúnnen jańa qulshynys pen tyń serpin alady. О́zine degen senimdiligi artady. Kóńil kúıi kóterilip, aınalasyna nur-shýaq sebedi. О́ıtkeni barlyq tirshilik tańǵy ýaqytta qaıta tirilip, jańa ómirge bet alady. Bul kezeń adamǵa rýhanı qýat beredi. Alýan túrli ıdeıalardyń tasqyndaıtyn shaǵy da osy kez. О́kinishke qaraı, uıqyny jaqsy kóretinder bul oljadan qur alaqan qalyp júr. Jaratýshy adam balasyna zor qabilet pen sheksiz múmkindikter syılaǵan. Tańǵy jattyǵýdan qapy qalǵan jannyń aǵzasyndaǵy zat almasý úderisi baıaýlap, ımmýndy jasýshalardyń qurylýy báseńdeıdi. Túrli aýrýlarǵa tótep berý qabileti tómendeıdi. Jan men tándi baptaýdyń eń lázzatty ári arzan túri – tańǵy serýen, – deıdi psıholog Dına Hasenova.
Álem dárigerleri pandemııa kezinde syrqattan saqtanýdyń tóte joly qımyl-qozǵalysty údetip, tańerteńgi ýaqytta kóbirek serýendeý ekenin jarysa jazdy. Táni saýdyń – jany saý. Ár kúnimizdi nátıjeli ári tabysty ótkizý tańdy qalaı bastaǵanymyzben tikeleı baılanysty.
ALMATY