20-dan astam zamanaýı áskerı tehnıka «Batys» aımaqtyq qolbasshylyǵynyń teńiz brıgadasyna alyndy. Ol mashınalardy jóndeýge, súıreýge jáne evakýasııalaýǵa arnalǵan, dep habarlaıdy Egemen.kz Qoǵamdyq kommýnıkasııa ortalyǵy Aqtaý garnızonynyń baspasóz qyzmetine silteme jasap.
Aqtaý garnızonynyń №25744 áskerı bólimine temir jol kóligimen KamAZ 43114 jáne KamAZ 43118 tehnıkalyq kómek mashınalary, sondaı-aq PAZ-32054 shaǵyn klasty avtobýstar jetkizildi.
«Jańa tehnıka qysqa merzim ishinde jetkizildi. Mysaly, tehnıkalyq kómek mashınasy (MTP) kóp maqsatty avtokólik tehnıkasyn aǵymdaǵy jóndeýge, tehnıkalyq qyzmet kórsetýge jáne evakýasııalaýǵa arnalǵan. MTP jyldyń kez kelgen ýaqytynda jáne kez kelgen aýa raıy jaǵdaıynda avtokólik tehnıkasyn jóndeý, evakýasııalaý jáne qyzmet kórsetý boıynsha keń fýnksıonaldyq múmkindikterge ıe. Oqshaýlaý retinde qalyńdyǵy 40 mm tómen jylý ótkizgishtigi bar materıaldar qoldanylady, bul qorshaǵan ortanyń temperatýrasy – 40 S° - tan + 40 S-qa deıin bolǵanda MTP paıdalanýǵa múmkindik beredi. Tehnıka jan – jaqty, ol keptelip qalǵan avtomobılderdi shyǵarýǵa, olardy súıretý jáne jartylaı tıeý ádisimen evakýasııalaýǵa múmkindik beredi», dep atap ótti brıgada komandıriniń qarý-jaraq jónindegi orynbasary Aslan Nurjanov.
Aqtaý garnızonynyń baspasóz qyzmeti Qazaqstan Respýblıkasynyń Qurlyq áskerleri arsenalynda tankter, jaıaý áskerdiń jaýyngerlik mashınalary, bronetransporterler, túrli qýattylyqtaǵy jáne maqsattaǵy artıllerııa, tankke qarsy zymyran keshenderi, zenıttik zymyran keshenderi, basqarý quraldary, avtomatty atys qarýy bar ekenin atap ótti.