2023 jyly Týrızm jáne sport mınıstrligi qurǵan arnaıy chat-bottarǵa zańsyz oıyn bıznesine kúdikti oryndaryn kórsetip 100 adam shaǵymdanǵan. Mınıstrlik azamattardyń lýdomanııaǵa qarsy birlesken belsendi kúresi elimizdegi osy máseleni sheshýge mol úles ekenin atap ótti, dep jazady Egemen.kz.
Mınıstrlik 2023 jyldyń qarasha aıynan bastap «Telegram» (https://t.me/stop_online_casino_bot) jáne «WhatsApp» (+7 707 9071507) messendjerlerinde chat-bottardy iske qosty.
Turǵyndar arnaıy arnalar arqyly zańsyz oıyn bıznesi, býkmekerlik keńse, utys oıyndary men ınternette kúdik týdyratyn jarnama nyshandaryn baıqasa, tártip buzýdyń aldyn alý úshin jedel habarlaýǵa bolady.
«Búgingi kúni mınıstrliktiń chat-botyna 100-den astam ótinish kelip tústi. Budan basqa, mınıstrlik zańsyz jelilik resýrstardyń uıymdastyrýshylary men benefısıarlary bolyp tabylatyn Qazaqstan azamattaryna qatysty quqyqtyq baǵalaý, zerdeleý jáne tekserý júrgizý úshin tıisti materıaldardy quqyq qorǵaý organdaryna usynady. Sonymen qatar mınıstrlik quqyq qorǵaý organdarymen jáne aqparat salasyndaǵy ýákiletti organmen birlesip, únemi «Kıbernadzor» aqparattyq júıesin paıdalana otyryp ınternet jelisinde zańǵa qaıshy kontentti taratýǵa qarsy kúres júrgizedi», delingen mınıstrlik habarlamasynda.
«Kıbernadzor» aqparat júıesine ınternet-kazıno qyzmetiniń belgileri bar 8284 materıal salynyp, onyń ishinde mazmundy zerdeleý nátıjesinde 4459 saıt buǵattalǵan.
Aıta keteıik, Qazaqstanda oıyn bıznesine mınıstrliktiń lısenzııasy negizinde Almaty jáne Aqmola oblysynda ornalasqan eki aýmaqta ǵana qyzmet etýge ruqsat etilgen. Osy erejeni attap ótip, zańsyz oıyn uıymdastyrǵan azamattardyń aıyby anyqtalsa 7 jylǵa deıin bas bostandyǵynan aıyrý, qylmystyq tabysynyń 20 eselengen mólsherinde aıyppul arqalap, múlkin tárkileý túrinde qylmystyq jaýapkershilikke tartylady.