Prezıdent Qasym-Jomart Toqaev «Ulttyq qor – balalarǵa» degen bastama kóterip, osy maqsatty júzege asyrý úshin quqyqtyq tetikterdi rettep berdi. Bul týraly Senat depýtaty Nurtóre Júsip aıtty, dep habarlaıdy Egemen.kz.
«2024 jyly Ulttyq qordan osy maqsatqa bólingen qarajattyń jalpy somasy – 695 mıllıon dollar. Bul qarajatty elimizdegi 6 mıllıon 919 myń 131 balaǵa bólgende 100 dollar 50 sentten keledi eken. Al Ulttyq qor qarajaty kóbeıgen saıyn balalarǵa arnalǵan qarjy kólemi de ulǵaıa túsedi. Búgin arnaıy ashylǵan esepshottarǵa alǵashqy tólem tústi. Bul ata-analardyń erteńgi kúnge degen senimin arttyrady.
Senat Tóraǵasy Máýlen Áshimbaev búgin jýrnalısterge bergen suhbatynda Ulttyq qordan balalarǵa túsip jatqan tólem kólemi boıynsha birqatar túsinikteme berip, Ulttyq qor qarajatyn kóbeıtýge jáne únemdeýge múddeli bolǵanda balalarǵa baǵyttalǵan ınvestısııalyq tabys kólemi de arta túsetinin aıtty.
Memleket basshysy buǵan deıin aldaǵy ýaqytta ishki jalpy ónim kólemin 2 ese arttyrý týraly aıtqan edi. El ómirindegi naqty ózgerister osylaısha oń nátıje bere bastaıtyny anyq», dedi senator.