Almatyda Qazaqstan Premer-mınıstri Álıhan Smaıylov pen Reseı Úkimetiniń tóraǵasy Mıhaıl Mıshýstın kezdesti. Kelissózder Eýrazııalyq úkimetaralyq keńestiń otyrysy qarsańynda ótti, dep jazady Egemen.kz.
Taraptar saýda, ınvestısııa, ónerkásiptik yntymaqtastyq, energetıka, kólik-logıstıka, aýyl sharýashylyǵy jáne bilim berý salalaryndaǵy memleketaralyq yntymaqtastyqtyń keń aýqymdy máselelerin talqylady.
Atap aıtqanda, qazaqstandyq kómirdi Reseı Federasııasynyń aýmaǵy arqyly tasymaldaý, sondaı-aq qazaqstandyq tasymaldaýshylardyń Reseıge kirýine qatysty problemalardy joıý máseleleri jan-jaqty talqylandy.
Álıhan Smaıylov eki memleket basshylarynyń saıası erik-jigeriniń arqasynda Qazaqstan Respýblıkasy men Reseı Federasııasy arasyndaǵy qarym-qatynastar ózara qurmet qaǵıdattary negizinde progressıvti túrde damyp kele jatqanyn atap ótti.
«Reseı Qazaqstannyń negizgi saýda-ekonomıkalyq seriktesteriniń biri bolyp tabylady, buǵan ótken jyldyń 11 aıynda 24 mıllıard dollardy quraǵan taýar aınalymynyń keremet kólemi dálel», dedi ol.
Úkimet basshysynyń aıtýynsha, Qazaqstan óńiraralyq jáne shekaralyq yntymaqtastyqty damytýǵa úlken kóńil bólip otyr. Bul baǵyttaǵy tıimdi alań – О́ńiraralyq yntymaqtastyq forýmy.
«Aǵymdaǵy jyl birlesken is-sharalar men túrli deńgeıdegi ózara baılanystar turǵysynan qarqyndy bolatynyna senimdimin. Qazaqstan úkimeti barlyq salalarda tolyq aýqymdy jáne ózara tıimdi yntymaqtastyqty damytýǵa daıyn», dedi Álıhan Smaıylov.
Mıhaıl Mıshýstın dástúrli qonaqjaılylyq úshin alǵys aıtyp, Reseı Qazaqstanmen ózara tıimdi qarym-qatynastardy nyǵaıtýǵa basymdyq beretinin atap ótti.
Biz ónerkásip, avtomobıl, energetıka, munaı-hımııa, kólik ınfraqurylymy, sıfrlyq ekonomıka jáne basqa da kóptegen salalarda iri ınvestısııalyq jobalardy birlesip júzege asyryp jatyrmyz. Biz jańa óndiris tizbeginiń qurylysyn jedeldetýdi usynamyz», dedi RF Úkimetiniń tóraǵasy.