Almaty oblysyndaǵy «Altyn Orda» bazarynyń burynǵy atqarýshy dırektoryna qatysty sot úkimi shyqty, dep habarlaıdy Egemen.kz.
Bul týraly Almaty oblystyq sotynyń baspasóz qyzmeti habarlady. Oǵan 296-baptyń 4-bóligi «Asa iri mólsherdegi esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý» boıynsha aıyp taǵyldy.
О́tken jazda Almaty-Bishkek tas jolynda aıyptalýshydan jeke tintý kezinde untaqty zaty bar paket tárkilendi. Sot-hımııalyq saraptamanyń qorytyndysyna sáıkes, bul zat salmaǵy 1,796 gramm bolatyn psıhotroptyq zat «mefedron» ekeni anyqtaldy.
Prokýror sottalýshyny kináli dep taýyp, 5 jylǵa bas bostandyǵynan aıyrýdy surady. Sottalýshy óz kinásin moıyndamaı, aıǵaq berýden bas tartty.
«Sot úkimimen Marqabaevqa QK-niń 296-babynyń 4-bóliginde kózdelgen qylmystyq quqyq buzýshylyqty jasaǵany úshin kináli dep tanylyp, oǵan 4 jyl merzimge bas bostandyǵynan aıyrý jazasy taǵaıyndaldy», dep habarlady sottyń baspasóz qyzmeti.
Esterińizge sala keteıik, Ermek Marqabaev 2023 jyldyń maýsym aıynda Altyn Ordaǵa jaqyn kóshede ustalǵan edi. Tintý kezinde odan untaq pen tapansha tabylǵany habarlandy.
2023 jyldyń jeltoqsanynda «Altyn Orda» bazarynyń taǵy bir ıesi Danııar Álpıev te qamaýǵa alyndy. Ol alaıaqtyq jasady degen kúdikke ilingen.