Prezıdent kommýnaldyq-energetıkalyq sektordy jańǵyrtý jumystaryn jedeldetý kerektigin aıtty, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysynyń aıtýynsha, kommýnaldyq-energetıkalyq sektordy jańǵyrtý jumystaryn jedeldetý kerek. Eldi mekenderdiń tynys-tirshiligine qajetti barlyq júıe úzdiksiz jumys isteýin qamtamasyz etý mańyzdy. Bul – Úkimet pen ákimdikterdiń negizgi mindetiniń biri. Alaıda, jyl saıyn jylytý maýsymynda sol bir problemalar qaıtalana beredi. Prezıdenttiń aıtýynsha, memlekettik organdar qatelikter men olqylyqtardan sabaq almaı júr. Sonyń kesirinen osy sala qazirgi múshkil halge jetip otyr. Almatydaǵy ekinshi jylý elektr ortalyǵyndaǵy bý-gaz qondyrǵysynyń qurylysy sozylyp ketken.
«Ekibastuzdaǵy birinshi GRES-tiń energoblogyn qalpyna keltire almaı júrgenimizge on jyldan asty (2012 jyldan beri). Sondaı-aq Ekibastuzdaǵy ekinshi GRES-ti keńeıtý jáne kúrdeli jóndeý jobasy ýaqtyly júzege asyrylmaı jatyr. Úkimet, eń aldymen, bıyl apatty jaǵdaıdaǵy 19 jylý ortalyǵyn jańǵyrtý jumystaryn aıaqtaýǵa tıis. Sonymen qatar qýaty 700 megavattan asatyn qosymsha qýat kózimen qamtamasyz etý kerek. Belgilengen merzimdi shegerýge bolmaıdy», dedi Prezıdent.
Prezıdenttiń sózinshe, jalpy, elimiz elektr, jylý, sý óndirý jáne jetkizý qýatynyń tapshylyǵyn sezinip otyrǵany jasyryn emes. Balqash jylý elektr ortalyǵy qurylysynyń aıaqtalmaı qalýy, tabıǵı monopolııa sýbektileriniń ashyq jumys istemeýi, sondaı-aq tarıfterdiń ósimin qoldan tejeý – osynyń bári kezinde jiberilgen qatelikterdiń saldary.
Memleket basshysy tarıf tóńiregindegi máselelerge de toqtala ketti.
«Eń aldymen, tarıfter uzaq merzimge belgilenýi kerek. Bul mejeli ýaqyt ishinde salynǵan ınvestısııany aqtap, ınfraqurylym nysandaryn tıisti qalypta saqtaýǵa múmkindik beredi. Tabıǵı monopolııa sýbektilerine tarıfti belgili bir tabys normasyna saı eseptep, bekitýge ruqsat berý qajet. Tıimdi baqylaý júrgizý asa mańyzdy. Muny osy saladaǵy búkil úderisti tolyq sıfrlandyrý arqyly ǵana qamtamasyz etýge bolady», dedi Prezıdent.
Odan bólek jıynda resýrstardy esepteý jáne derekterdi onlaın rejımde berý júıesin engizý máselesi kóterildi. Qasym-Jomart Kemelulynyń paıymynsha, tarıfterdi ósirý tutynýshylarǵa ataýly sýbsıdııa berý isimen qatar júrýge tıis. Bul úderisti barynsha jeńildetip, avtomattandyrǵan jón.
«Úkimet eldiń kommýnaldyq-energetıkalyq ınfraqurylym nysandaryn qaıta qalpyna keltirip, damytý úshin naqty keshendi sharalar ázirleýi kerek. Sonymen qatar ákimder qalany abattandyrý jumystaryn belsendi qolǵa alyp, onyń lastanýyna jol bermeýi qajet. Eń aldymen, iri qalalarda qatty turmystyq qaldyqtardy qaıta óńdeıtin zaýyttar salý kerek. Ol úshin ınvestor tartý mańyzdy. Sondaı-aq kógaldandyrý isimen aınalysý qajet. Qazir bul jumys oıdaǵydaı júrgizilmeı jatyr. Elektr qýaty, jylý, sý, jalpy tıimdi kommýnaldyq sharýashylyq – basty ıgiligimiz. Onyń qoljetimdi bolýy halyqtyń turmys sapasyna tikeleı áser etedi. Bul – saladaǵy qordalanǵan barlyq máseleni kezeń-kezeńimen sheshýge múmkindik beretin mańyzdy ári keshendi reforma», dedi Qasym-Jomart Toqaev.