Ekinshi dúnıejúzilik soǵystyń sarbazy Qısym Ádıevtiń súıegi Atyraý qalasyndaǵy «Noǵaı» musylmandar zıratyna qaıta jerlendi. Atamnyn Amanaty qoǵamdyq birlestiginiń bastamasymen Qazaqstanǵa Qarýly Kúshterdiń Áýe qorǵanysy kúshteri áskerı-kóliktik ushaǵymen sarbazdyń súıegi Reseıden jetkizilgen bolatyn, dep habarlaıdy Egemen.kz.
Qorǵanys mınıstrliginiń baspasóz qyzmeti málim etkendeı, jaýyngerdiń rýhyna qurmet kórsetý úshin qalalyq ákimdik ókilderi, Aýǵan soǵysy ardagerleri, tájik-aýǵan shekarasyndaǵy bitimgerlik mıssııaǵa qatysýshylar, Atyraý qalasyndaǵy áskerı-tehnıkalyq mekteptiń kýrsanttary jınaldy.
Qısym Ádıev 80 jyldan astam ýaqyt boıy habarsyz ketkender tiziminde bolǵan. Jerlengen jerin reseılik «Fenıks» izdeý toby tapqan. Atamnyn Amanaty qoǵamdyq birlestigi onyń Atyraýda turatyn kishi uly Sembaı Qısymovty izdep tapqan.
Maıdangerdiń kaskasy men medali tabystalǵan balasy Sembaı Qısymov izdeýshilerge jáne súıegin elge qaıtarýǵa atsalysqandarǵa alǵys aıta kele: «Ákemniń musylmansha kindik qany tamǵan týǵan jerinde qaıta jerlengenin kórip, kóńilim jaı tapty», dedi.