Qaladaǵy jeke menshik mektepterdiń birinde, sabaq ústinde 8-synyp oqýshysynyń jaǵdaıy nasharlap, aýrýhanaǵa jetkizilgen. Degenmen, jasóspirim qyz jansaqtaý bóliminde tilge kelmeı kóz jumdy, dep habarlaıdy Egemen.kz.
Qaıǵyly oqıǵa 6 aqpan kúni bolǵan. 8-synyp oqýshysynyń mektepte jaǵdaıy nasharlap, esinen tanyp qalǵan. Aldyn-ala aqparatqa sáıkes, ol úıinde ájesiniń júrek aýrýyna qarsy dárisin kóp mólsherde iship qoıǵan. Keıin ádettegideı sabaqqa kelgen.
Mektep dırektorynyń aıtýynsha, ekinshi sabaqtyń ýaqytynda ózin jaısyz sezinip, esinen tanyp qalǵan.
«Biz jedel járdem shaqyryp, qyzdyń anasyn da shaqyrdyq. Keıin qyzdyń kóp mólsherde dári ishkeni anyqtaldy», deıdi dırektor.
О́zin jaısyz sezingen oqýshyǵa mektep medbıkesi alǵashqy kómek kórsetken. Al, jedel járdem qyzmetkerleri asqazanyn shaıǵan. Dárigerlerdiń aıtýynsha qyz balanyń júregi aýrýhanaǵa jetkenshe 2 ret toqtaǵan. Aýyr halde jetkizilgen naýqasty aman alyp qalý múmkin bolmapty.
«Qyz aýyr jaǵdaıda keldi. Ony biz birden jansaqtaý bólimine kirgizdik. Ol jerde taǵy 3-shi ret júregi toqtady. Ony da qaıta júrgizdik. Sonymen saǵat 10:46 óte aýyr jaǵdaıda kelip túsken naýqas saǵat 12:20-da atqarylǵan ıntensıvti sharalarǵa qaramastan qaıtys boldy», dedi dáriger.
Atalǵan jaıtqa qatysty «sýısıdke deıin jetkizý» babymen qylmystyq is qozǵaldy. Qazirgi ýaqytta tıisti saraptamalar taǵaıyndalǵan.