Úsh jylda Qazaqstannyń ekinshi naryǵynda páter quny shamamen 40 paıyzǵa qymbattady, dep habarlaıdy Egemen.kz aqparat agenttigi.
2021-2024 jyldar aralyǵyndaǵy usynystarǵa taldaý jasaǵan Krisha.kz sarapshylary osyndaı qorytyndy jasady.
Qymbatshylyqqa suranystyń artýy, zeınetaqy qorynan aqsha alýǵa ruqsat berý, dollar baǵamynyń ósýi, qurylys materıaldarynyń qymbattaýy (birinshi naryqtaǵy ózgeris ustalǵan úıge de áserin tıgizedi), 2022 jyly qurylys qarqynynyń báseńdeýi yqpal etti.
2021 jyly el bıligi zeınetaqy qorynan artyq aqsha alýǵa ruqsat berdi. Saldarynan ajıotaj bolyp, úı baǵasynyń sharyqtaýyna ákeldi. Bir jylda el azamattary shamamen 2,5 trıllıon teńge sheship alǵan. Turǵyn úımen baılanysty mámile sany aldyńǵy jylmen salystyrǵanda eki esege ósti. Ekinshi naryqta páter quny 27 paıyzǵa ósse, jańa úıler tipti 40 paıyzǵa qymbattady.
2022 jyly bılik qordan alýǵa ruqsat berilgen somany 70 paıyzǵa arttyrǵandyqtan, zeınetaqy qoryna júgingen, úı izdegen eldiń qarasy azaıyp qaldy. Alaıda qurylys materıaldary men jumys aqysy kóterilgen soń baspana quny sharyqtaı berdi. Bir jylda múlik ıeleri qoldan satqan páterlerdiń ortasha baǵasy taǵy 10 paıyzǵa ósti.
Byltyr naryq birshama turaqtady. I toqsanda baǵa azdap kóterilgenmen, jaz aıaǵyna qaraı qaıta tústi, al kúzde múlde toqtap qaldy, qysta da ózgeris baıqalmady. Bir jylda nebári 1,1 paıyzǵa aýytqyǵan.