Qoǵamdyq densaýlyq saqtaý ulttyq ortalyǵy saǵat beldeýin ózgertý el azamattarynyń densaýlyǵyna qalaı áser etetinin aıtty, dep habarlaıdy Egemen.kz.
Eske salaıyq, 1 naýryzdan bastap Qazaqstan boıynsha UTC+5 biryńǵaı ýaqyt beldeýi engiziledi.
«Bul sheshim kún 12:00-de sharyqtaý shegine jetken tabıǵı ýaqytqa sáıkes keletin «bıologııalyq turǵydan durys» ýaqyt beldeýin belgileý maqsatynda qabyldandy. Bul el turǵyndarynyń ál-aýqatyna, Almaty, Astana, Qaraǵandy, Shymkent jáne Túrkistan sııaqty iri qalalar, ásirese balalar densaýlyǵyna oń áser etedi», delingen Qoǵamdyq densaýlyq saqtaý ulttyq ortalyǵy usynǵan aqparatta.
Mamandar túsindirgendeı, sırkadtyq yrǵaqtardy tabıǵı ýaqytpen sınhrondaý adam denesindegi gormondardy óndirý úshin óte mańyzdy.
«Gormondar uıqyny, oıatýdy, belsendilikti jáne kúızelisti retteýde sheshýshi ról atqarady. Bul prosester gormondardyń deńgeıimen qatań baqylanady jáne belgili bir úlgiler men sıklderge ıe», delingen habarlamada.
Ortalyq jańa ýaqyt beldeýine beıimdelý úshin el azamattaryna «uıyqtaý jáne 15-20 mınýt erte oıaný ýaqytyn birtindep ózgertýge» keńes beredi.