Elimizde aqyly joldardyń tarıfteri ósedi. Bul týraly QR Kólik mınıstri Marat Qarabaev habarlady, dep jazady Egemen.kz.
Mınıstrdiń aıtýynsha, aqyly joldardyń tarıfterin 2-3 esege kóterý usynyldy.
«Buǵan deıin tarıfterdiń baǵasyn 2-3 ese kóterý usynylǵan edi. Bizdiń mamandar jolǵa qajet tehnıkany satyp alýdan bólek, joldardy kútip ustaýǵa qansha qarajat ketetinin esepteýi kerek», dedi Marat Qarabaev.Osy tusta vedomstvo basshysy aqyly joldardyń tarıfteri halyqpen talqylanatynyn alǵa tartty. Atalǵan talqylaýlar osy jyldyń naýryz aıynda bastalady dep josparlanyp otyr.
Marat Qarabaevtyń aıtýynsha, joldardyń tarıfi 11 jyl boıy ózgermegen.
«Tarıfti kóterýdi josparlap otyrmyz. Nege ekenin túsindirip keteıin. 2013 jyldan beri tarıf 11 jyl boıy ózgermegen, byltyr 20 paıyzǵa ósken. Máselen, bizdiń tarıfterimizdi Reseımen salystyryp kóreıik, eger Qazaqstanda tarıf 1 teńge 20 tıyn bolsa, Reseıde ulttyq valıýtamyzǵa aýdarǵanda - 7 teńge. Joldar sapaly bolýy úshin arnaıy tehnıkalyq qyzmet kórsetý, jóndeý kerek. Halyq bul shyǵyndar salyq tóleýshiler esebinen bolǵanyn qalamaıdy. Jalǵyz nusqa - tarıfterdi kóterý», dep túsindirdi mınıstr.