Kólik mınıstri Marat Qarabaev el aýmaǵyndaǵy 59 temirjol vokzalyn kúrdeli jóndeýden ótkizý qajet ekenin málimdedi. Osy maqsatqa jyl sońynda bıýdjetten qarjy bólinedi, dep jazady Egemen.kz.
Qazir Qazaqstannyń 4 qalasyndaǵy (Túrkistan, Shymkent, Pavlodar, Qyzylorda) temirjol turaqtary kúrdeli jóndeýden ótip jatyr. Mınıstr basqa aımaqtaǵy vokzaldardyń jaǵdaıy syn kótermeıtinine mán berdi.
«О́kinishke qaraı, qalǵandaryna múldem qarjy da bólinbegen, jaı-kúıi de tómen. Ár vokzaldyń óz tabysy 50-60% ǵana qamtı alady. Osyǵan baılanysty barlyq ákimdik jobalyq-smetalyq qujattama ázirlep jatyr. Osy jyldyń sońynda biz oǵan qarjy bólý jaǵyn bıýdjetten qarastyramyz ba dep otyrmyz», dedi Marat Qarabaev.
Al vokzaldardy jóndeýge jaýapty «Qazaqstan temir joly» kompanııasynyń qarjysy vagon, lokomatıv alýǵa jumsalyp jatqandyqtan, bul iske aqsha bıýdjetten bólinbek.
«Munda ákimdermen keliskenimiz – ǵımaratty jóndeýdi respýblıkalyq bıýdjetten qarastyramyz. Temirjol vokzalynyń aýlasyn ákimdik bıýdjeti esebinen kelisemiz. Biraq jobalyq-smetalyq qujattamany ákimderdiń ózderi daıyndap jatyr. Temirjol vokzaldaryn jańartý sapanyń artýyna septigin tıgizedi», dedi mınıstr.