Prezıdent tapsyrmasyna sáıkes aqparattyq tehnologııalar salasyna keler jylǵa deıin 100 myń kadr daıarlaý mindeti tur. Búginde elimizdegi oqý oryndarynyń 80-nen astamy IT salasyna maman daıarlaıdy. Biraq olardyń kópshiliginde bilim berý baǵdarlamasyna qatysty týyndap otyrǵan túıtkilder barshylyq.
Ǵylym jáne joǵary bilim mınıstri Saıasat Nurbek Almatyda ótken «Digital Almaty-2024»: «Industry X: Bolashaqtyń sıfrlyq evolıýsııasy» atty VI sıfrlyq forýmy aıasynda IT mamandar daıarlaýǵa taldaý jasaǵanda sıfrly bolashaqtyń mamandaryna joǵary bilim berip, óz baǵdarlamasyn jańartyp otyratyn, zerthanalarǵa, ınfraqurylymǵa ınvestısııa salatyn, saladaǵy ózgeristi baqylaıtyn 14 joǵary oqý ornynyń anyqtalǵanyn jetkizdi. Mınıstrdiń aıtýynsha, qazirgi kezde jastardyń kópshiligi aqparattyq tehnologııalardy óz bolashaǵymen baılanystyrady. Sondyqtan joǵary oqý oryndary osy baǵytta sapaly bilim berý baǵdarlamasyn kúsheıtýi kerek. Munyń qatarynda mamandyqtyń negizin, fılosofııasyn tereń túsinetin ári júıeli kózqarasy bar mamandar daıarlaýdy maqsat tutatyn ınjenerlik bilim berýdiń ulttyq modelin ázirleý qajettigi týyndap otyr.
Indýstrııa 4.0. dáýirinde joǵary oqý oryndary túlekteriniń jasandy ıntellektini ıgerýde oqý baǵdarlamasynyń jańa zamanmen úılesimi jáne álemdik bilim keńistigimen yqpaldastyǵy óte mańyzdy. Osyǵan oraı qazirgi kezde tehnologııalyq ınnovasııalarǵa baǵyttalǵan úzdik tájirıbelerge nazar aýdarý, ınteraktıvti platformalardy, oqytý modelderin daıyndaý qajet.
Ǵylym jáne joǵary bilim mınıstri osy oraıda bilikti mamandar daıarlaý men zamanaýı oqý baǵdarlamasymen qamtamasyz etýdiń mańyzyna toqtalyp, sıfrly ekonomıkanyń jańa talabyna saı ádistemeniń qajet ekenin alǵa tartty. Bul baǵytta bilim birlestikteri jáne tehnologııalyq kóshbasshylarmen áriptestik eńbek naryǵyna beıindi mamandar tárbıeleýge múmkindik beredi. Osy baǵytta byltyrdan bastap memlekettik standart bilim berý men ádisteme turǵysynan 90 paıyzǵa ózgergen. Búginde elimizdiń 14 joǵary oqý ornynda AI-Literacy jasandy ıntellekt boıynsha kýrstar ótedi. Kelesi jyldan bastap jasandy ıntellekt salasynda bazalyq bilimi alý úshin «Huawei» kompanııasynyń qoldaýymen arnaıy kýrs barlyq stýdent úshin qoljetimdi bolady. Ǵylymı-zertteý jáne tájirıbeli konstrýktorlyq bazasy ozyq «Huawei» kompanııasymen kelisimshart jasalyp, elimizdegi ýnıversıtetterde 50 aldyńǵy qatarly zerthana ashý kózdelip otyr. Byltyr elimizde mundaı zerthananyń 33-i ashyldy.
Innovasııalyq tehnologııalar ortalyqtaryn oqý úderisine ıntegrasııalaýdyń mańyzy men bolashaq túlekterdiń sapaly bilim alýyna toqtalǵan IDC vıse-prezıdenti Andreı Beklemıshev álemdik ýnıversıtetter tájirıbesindegi ozyq tehnologııany meńgerý, tájirıbeni ushtaý, jetekshi kompanııalarmen yntymaqtastyq arqyly ınnovasııalyq ortada daǵdylardy damytýǵa múmkindik beretin mamandandyrylǵan ortalyq qurý týraly aıtty.
Búginde mamandardy jumysqa ornalastyrý máselesi óte ózekti sanalady. Sarapshylar osy jaǵdaıdy ózgertýge múmkindik beretin birqatar faktordy atap, bilim berý baǵdarlamasyn qazirgi eńbek naryǵynyń qajettiligine qaraı beıimdeý, jastar arasyndaǵy kásiptik baǵdarlaý úrdisin jaqsartý, sondaı-aq sıfrlyq ındýstrııa kóshbasshylaryn bilim berý salasyna tartýǵa nazar aýdardy. Mysaly, «Huawei» sııaqty alpaýyt kompanııalarda taǵylymdamadan ótý, trenıngterge jáne konkýrstarǵa qatysý túlekterge bolashaqta múmkindik ashyp qana qoımaı, tabysy joǵary jumys ornyna ornalasýyna yqpal etedi. Búginde atalǵan kompanııada elimizdegi aqparattyq kommýnıkasııalyq tehnologııalar boıynsha oqý oryndaryn bitirgen túlekter jumys isteıdi. Aldaǵy ýaqytta bilikti mamandar daıarlaýda jańa tehnologııalarǵa negizdelgen bilim baǵdarlamasy men zerthanalar parkin kóbeıtý mindeti tur.
ALMATY