Ulttyq qaýipsizdik komıteti testileý ortalyǵynyń zańmen qorǵalatyn aqparatyna qol suqqan Qaraǵandy, О́skemen qalasynyń turǵyndaryn ustady, dep jazady Egemen.kz.
Tergeý barysynda «S», «J» jáne «N» esimdi azamattar 2023 jyly Ulttyq testileý ortalyǵynyń aqparatyn kóshirgeni anyqtaldy. Olar UBT suraqtarynan bólek magıstratýra, pedagogtardyń bilim kórsetkishin baǵalaıtyn testti de qoldy etken.
UQK baspasóz qyzmeti kúdikti azamattardyń qylmysy tolyq dáleldengenin málimdedi.
«Qylmystyq kodekstiń 205-baby 2-bólimimen jáne 208-baby 2-bóligimen qarastyrylǵan qylmystardy jasaǵandary úshin kináli dep tanylǵan «S», «J» jáne «N» esimdi Qazaqstan azamattaryna qatysty Qaraǵandy qalasy Qazybek bı aýdandyq soty men О́skemen qalasy № 2 sotynyń úkimderi zańdy kúshine endi.
Olardyń árbirine 1 jyl bas bostandyǵynan shekteý jazasy belgilendi, sondaı-aq aqparattyq tehnologııa jáne telekommýnıkasııa jelileri salasynda laýazymdy qyzmetke turý quqyqtarynan 3 jyl merzimge aıyryldy», delingen habarlamada.