Úshemderdi dúnıege ákelgen Taldyqorǵan qalasynyń 28 jastaǵy turǵyny kópbalaly ana atandy. Bul – Jetisý oblysy qurylǵannan beri ómirge kelgen alǵashqy úshem. Jas otbasy kópten kútken balalaryna «Ańsaǵan sábı» baǵdarlamasy arqyly qol jetkizgen. Jańa jyldan keıin dúnıe esigin ashqan perishteler shala týǵandyqtan dárigerler jaıdarman jańalyqty kópshilikten jasyrǵan. Qazir sábılerdiń jaǵdaıy jaqsy.
Jalpy, «Ańsaǵan sábı» memlekettik baǵdarlamasy sheńberinde EKU úshin ótken jyly óńirge 221 kvota berilgen. Al osy jyly 217 kvota bólingen eken. Árıne, bul az, degenmen aldaǵy ýaqytta budan da kóp kvota berý qarastyrylyp jatyr. Sebebi osy arqyly kóptegen ata-ana qýanyshqa kenelip jatyr.
Taldyqorǵandyq Samal Amanjolova men Ernur Dúmbergenovterdiń shańyraǵynda – úlken qýanysh. Bıyl 10 qańtarda olardyń eki ul, bir qyzy merziminen buryn dúnıege keldi. Medısına qyzmetkerleriniń aıtýynsha, ul balalar 1800-1850 gr, qyz bala 1400 gr salmaqpen týǵan. Dárigerler úshemderdi aldymen jansaqtaý bóliminde turaqty baqylaýda ustap, tıisti em-sharalardy jasap, keıin palataǵa shyǵaryp, kútip-baptaǵan. Edáýir salmaq jınap, jaǵdaıy jaqsarǵan úshemder men olardyń anasyn búgin Taldyqorǵandaǵy perınataldyq ortalyqtaǵylar saltanatty rásimmen úıine shyǵaryp saldy.
«Úshemder 30 apta 5 kún merziminde ómirge keldi. Alǵashqy kúnderi olardyń jaǵdaıy aýyr boldy, úsh kún arnaıy apparatta jatty. Balalardyń densaýlyǵyn bir aıdan asa ýaqyt dárigerler baqylaýda ustady. Alǵashynda olardyń salmaǵy 1400-1800 gramm shamasynda bolǵan. Bir aı kóleminde náresteler 400 gramǵa deıin salmaq qosty. Búginde balalardyń densaýlyǵy qalypty», deıdi Taldyqorǵandaǵy oblystyq perınataldyq ortalyqtyń bólim meńgerýshisi, shtattan tys neonatolog Danııar Rasýlov.
Jas jubaılar sábılerine Zeınep, Zeıin jáne Zeınur degen esim berdi. Dúmbergenovterdiń tuńǵyshy qazir – 10 jasta. Sóıtip, jas otbasy kópbalaly atanyp otyr.
«Qudaıdyń qalaýymen, EKU-nyń sebepshi bolýymen kópten kútken sábılerimiz ómirge keldi. ÝZI arqyly úshem ekenin bilgende tańǵaldyq ári qýandyq. Júktilik kezeńi jaqsy ótti. Degenmen 7 aılyq merzimde qıyndyqtar týyndap, dárigerlerdiń meni kesarevo tásilimen jedel bosandyryp alýyna týra keldi. Operasııa jasap, nárestelerimizdiń aman-esen ómirge kelýine eńbek sińirgen akýsher-gınekolog Zeınegúl Rahmetovaǵa aıtar alǵysym sheksiz. Operasııa ústeline aparǵanda qatty qoryqtym, biraq dáriger maǵan bárin túsindirip, kóńilimdi tynyshtandyryp, qorqynyshymdy jeńýime kómektesti. Joldasym ekeýmiz aq jeleńdi abzal jannyń qurmetine qyzymyzdyń atyn Zeınep dep atadyq, uldarymyzǵa Zeıin, Zeınur degen esim berdik. Sonymen qatar dáriger Raýshan Júsipqyzyna da rızashylyǵymdy bildiremin. Qan qysymym kóterilip, densaýlyǵym syr bergende em-dom jasap, «Samal, balalar úshin ózińdi myqty ustaýyń kerek», dep únemi maǵan motıvasııa berip otyrdy. Búgin, mine, úıimizge baramyz. Baýyrlary men sińlisin úıde 10 jastaǵy ápkesi asyǵa kútip otyr», deıdi Samal Amanjolova.
Oblystyq densaýlyq saqtaý basqarmasynyń ókilderi úshemderdi shyǵaryp salý rásimine arnaıy baryp, sábılerge arnalǵan jórgekter jıyntyǵyn syıǵa tartty. Oblystyq perınataldyq ortalyqtyń bosanýdan keıingi bóliminiń meńgerýshisi Zeınegúl Beısenǵalıqyzynyń aıtýynsha, bul – onyń eńbek tájirıbesinde ómirge kelgen úshinshi úshem.
«Rezıdentýrany aıaqtaǵan soń Almaty qalasynda bir jyl jumys istedim. Sol ýaqytta úshemderdiń aman-esen ómirge kelýine atsalysyp, birneshe operasııada dárigerlerdiń kómekshisi boldym, al osy joly operasııany dáriger retinde ózim jasadym. Taldyqorǵandaǵy oblystyq perınataldyq ortalyqta jumys istep jatqanyma 5 jyl boldy, jalpy dárigerlik eńbek ótilim – 10 jyl. Osy jolǵy operasııa kúrdeli boldy, degenmen bárimizdiń ortaq kúsh biriktirýimiz arqyly sátti ótti», deıdi jas maman.
Osy rette taǵy bir qýanyshty jańalyqpen bólese ketsek deımiz. Sarqan kentinde 43 jastaǵy áıel onynshy perzentin ómirge ákeldi. Kópbalaly ana Jasııa Janatbek joldasy ekeýi 7 qyz, 3 ul ósirip otyr. Bul týraly Sarqan aýdanynyń ákimdigi aıtyp berdi.
Baǵdar men Jasııa Sarqan qalasynda 15 jyldan beri turady, 10 bala tárbıelep otyrǵan otbasynyń kenje qyzy Iаsmın jýyrda ómirge keldi. Ananyń onynshy perzentin ómirge ákelýge Sarqan aýdandyq ortalyq aýrýhanasynyń dárigerleri kómektesti.
«Jasııa Janatbek – 1980 jylǵy azamat. Jalpy júktilik merzimi qalypty ótti, oǵan áıeldiń óz kóńil kúıin jaqsy ustaýy da áser etedi. Kórsetilimine baılanysty 4 aqpanda kesarevo jasaldy. Qazir ana men balanyń jaǵdaıy jaqsy. Búgin olardy úıine shyǵardyq. Bizdiń aýrýhana úshin onynshy perzentin bosandyryp alý – sırek qubylys», deıdi aýdandyq aýrýhananyń perzenthana bóliminiń meńgerýshisi Ǵalııa Menısova.
Otbasynyń tuńǵyshy Hahıda – 23 jasta, qazir onyń ózi otaý quryp, eki balanyń anasy bolyp otyr. Ekinshi qyzy Roza – 19 jasta, stýdent. Almaty qalasynda Qazaq ulttyq qyzdar pedagogıkalyq ýnıversıtetiniń 2-kýrsynda oqıdy. Uljan, Ulyhan, Jambyl men Aıtóre – áli oqýshy, kishileri egiz Imran men Iаsın – úsh jasta. Jasııa Janatbek «Kúmis alqa», «Altyn alqamen» marapattalǵan. Joldasy Baǵdar mal sharýashylyǵymen aınalysady.
Sarqan aýdandyq ortalyq aýrýhanasynyń perzenthana bóliminiń málimetine qaraǵanda, jyl basynan beri dárigerler 20-dan asa áıeldi aman-esen bosandyryp, shyǵarǵan. Sonyń úsheýi – 40 jastan asqan analar.
Jalpy jyl basynan beri Jetisý oblysynda 977 bala ómirge kelgen.
Jetisý oblysy