Shyǵys Qazaqstannyń taýly óńirlerine omartashylar aýadaı qajet. Olar ara ustap, baldy baptaýmen ǵana emes, ony túrlendirýmen de shuǵyldanýǵa tıis. Sondyqtan da S.Amanjolov ýnıversıtetinde «Orman resýrstary, ańshylyq jáne ara sharýashylyǵy» bilim berý baǵdarlamasy aıasynda on stýdent bilim alyp júr.
Bireý biler, bireý bilmes, keshegi keńes úkimeti kezinde Altaıdyń balyn baı-baǵlandar ortalyqqa attaı qalap alǵyzyp otyrǵan eken. Sapasy da, sany da ózge óńirlerden áldeqaıda alda edi. Alda bolmaǵanda she?! Taýly ólkeniń myń túrli gúlinen alynǵan bal – dám ǵana emes, em de. Alaıda brendti bızneske aınaldyrýmen shektelmeı, onyń sapasyn ustap turýdy da omarta sharýashylyqtary kún tártibinen túsirmeýi tıis. Teorııalyq bilim alǵan stýdentter qazirgi ýaqytta omarta sharýashylyǵynda arnaıy praktıkadan ótip júr.
– Qys mezgilinde stýdentter bal ónimderin arnaıy qurylǵymen qattaıdy, qaptaıdy, japsyrma qaǵazdaryn japsyrady. Bizdiń sharýashylyqta omartaǵa qajetti tehnıkanyń barlyq túri bar. Demek, stýdentter bilikti maman bolyp shyǵady, – deıdi «Paseka» omarta sharýashylyǵynyń qyzmetkeri Raısa Qasymbaeva.
Shyǵysta týrızm salasy damyǵan saıyn balǵa suranys artyp keledi. Suranys artqanymen, omartashy mamandar qat. Erteńgi kúni barymyzdy, balymyzdy joǵaltyp almaý úshin arashylardy búgin daıyndap jatyr.
Praktıkanttar sonymen qatar jaz mezgilinde bal shaıqaýǵa qatysady. Omartalardy jabdyqtap, arany kútip-baptaýmen aınalysady. Aıta keteıik, keıin stýdentterde ózderi qalaǵan tájirıbe bazalarynda jumysqa ornalasýǵa múmkindik bar. Jalpy, S.Amanjolov ýnıversıteti túlekteriniń jumysqa ornalasý kórsetkishi 98 paıyzdy quraıdy.
Shyǵys Qazaqstan oblysy