«Byltyr 10 shildede Memleket basshysy «Onlaın-platformalar jáne onlaın-jarnama týraly» zańǵa qol qoıdy. Zań jobasy Qazaqstanda qaýipsiz onlaın orta qurýǵa baǵyttalǵan. Qujattaǵy kórsetilgen negizgi quqyqtyq tetikterdiń biri – jelidegi jarnamany tańbalaý mindettemesi. Biz zerttegen halyqaralyq tájirıbe kórsetkendeı, jetekshi elder onlaın-jarnamanyń mańyzdy rólin jáne ony onlaın-platformalarda kórsetý tetikterine erekshe nazar aýdarady. Sonymen qatar onlaın-jarnamanyń ashyqtyǵyn arttyrýǵa baǵyttalǵan talaptardy kózdeıdi», delingen jazbada.
Osy rette mınıstr «Ádilet» portalynda jelidegi jarnamany tańbalaý erejelerin belgileıtin buıryq jarııalanǵanyn jazdy. Ol ereje 2 naýryzdan bastap kúshine enedi.
«Erejeler bızneske áser etý úshin oń baǵalanǵanyn jáne tolyǵymen Qazaqstannyń onlaın segmentinde keń taralǵan qazirgi tájirıbege negizdelgenin atap ótý qajet. Osy erejelerdi qalyptastyrý kezinde kommersııalyq negizde ornalastyrylǵan kontentti óz betinshe belgileıtin medıa-sýbektiler tájirıbesine súıendik. Biz óz kezegimizde osy trendti Qazaqstan Respýblıkasynyń búkil ınternet keńistigine taratý jón dep esepteımiz», dep jazdy Aıda Balaeva.
Osy erejege sáıkes ınflıýenserler (blogerler) kommersııalyq nemese sharttyq negizde ornalastyratyn onlaın-jarnamany tańbalaýǵa tıis. Olar jarııalanymnyń basynda nemese sońynda onlaın ortada belsendi qoldanylatyn tómendegideı tujyrymdardyń birin kórsetý kerek:
- «jarnama»;
- «jarnamalyq materıal»;
- «seriktestik materıal»;
- «demeýshilik materıal»;
- «jarnama quqyǵynda»;
- «demeýshimen tólengen»;
- «PR quqyǵynda»;
Áleýmettik jarnamany (qaıyrymdylyq jáne kommersııalyq emes sıpattaǵy basqa da qoǵamdyq paıdaly maqsattarǵa qol jetkizýge baǵyttalǵan) jáne jedel habar almasý qyzmetterinde (messendjerler) ornalastyrylatyn jarnamany belgileýdiń qajeti joq.