Qasym-Jomart Toqaev D.Serikbaev atyndaǵy Shyǵys Qazaqstan tehnıkalyq ýnıversıtetine baryp, joǵary oqý ornynyń qyzmetimen tanysty jáne onyń bazasynda qurylǵan «Lý Ban sheberhanasy» oqý ortalyǵyn aralap kórdi, dep jazady Egemen.kz Aqordanyń baspasóz qyzmetine silteme jasap.
Prezıdentke bilim oshaǵynyń ǵylymı-ınnovasııalyq ekojúıesi týraly málimet berildi. Rektor Sáýle Rahmetýllınanyń aıtýynsha, byltyr ýnıversıtet bazasynda Smart engineering quzyretter ortalyǵy ashylǵan. Ortalyq mashına jasaý, taý-ken jáne metallýrgııa kesheni salalaryndaǵy ımportty almastyrýshy tehnologııalardy damytýdy kózdeıdi.
Memleket basshysyna jastardyń ınnovasııalyq jobalar jasaýyna múmkindik beretin medısına baǵytyndaǵy tehnoparktiń negizin qalaý jospary jóninde baıandaldy. Qazirdiń ózinde ýnıversıtette ázirlengen 40-tan astam medısınalyq ımplantat túri klınıkalyq synyqtan ótkizilip jatyr.
Qazaq-nemis ýnıversıtetimen birlesip, metallýrgııa, paıdaly qazbalardy ıgerý baǵytynda Ǵylym jáne tehnologııa ınstıtýtyn ashý josparlanǵan.
«Lý Ban sheberhanasy» «Avtomobılderdiń ınnovasııalyq konstrýksııasy» jáne «Avtomobılderdiń SMART tehnologııasy» sııaqty eki zerthanadan turady. Ortalyqtyń bir ereksheligi – munda stýdentter praktıkalyq daǵdylardy meńgerip, avtomobıl júıelerine sımýlıasııalyq synaq júrgize alady. Sondaı-aq ortalyqta elektromobılder men gıbrıdti kólikterge tehnıkalyq qyzmet kórsetý jáne dıagnostıka jasaý úshin jańa tehnologııalardy ıgerý isine aıryqsha mán beriledi.