Qaqaǵan aıazda qalyń muzdy qaq jaryp balyq aýlaǵanǵa ne jetsin? Ony sporttyń bir túrine aınaldyrsańyz, tipti qyzyq. Muny alakóldikter erteden oılasa kerek. Osy oraıda shıpaly kóldiń ústinde tuńǵysh ret muzdaǵy balyq aýlaý týrnıri ótti. Elimizdiń túkpir-túkpirinen 60-qa tarta balyqshy baǵyn synap, ózara myqtyny anyqtady.
Atalǵan týrnırge Almaty jáne Abaı oblysynan, sonymen qatar óz óńirimizden júzdegen adam qatysty. Tipti dodadan shyǵyp qalǵandar da boldy. Munda baptan góri, baqtyń basymyraq júretini belgili. Qarttarmen qatar jastar da saıysqa túsip, sheberligin kórsetti.
Kópshilik jazda Alakóldiń shıpaly sýyna shomylsa, kól betine muz qatqan qys mezgilinde balyq aýlaǵandy unatady. Osy oraıda Alakól aýdandyq ákimdiginiń bastamasymen turǵyndar arasynda «Alakól-2024» muz asty balyq aýlaý týrnıri ótti. Týrnırdi uıymdastyrý jumystaryn «Balqash-Alakól oblysaralyq basseıindik balyq sharýashylyǵy ınspeksııasy» RMM men «Prıchal» ańshylyq dúkeni atqarǵan.
Alakól aýdandyq ákimdiginiń málimetine súıensek, jalpy sany 51 adam qatysqan týrnır asa tartysty ótken. Kól jaǵasyna alys-jaqyn óńirlerden kelgen balyqshylar toptasqan. Keler jyly shetelden kelýge nıetti týrıster de bar eken. Ony uıymdastyrýshylar da jasyrmady. Olar aldymen qatysýshylarǵa jarys erejesi men qaýipsizdik erejesin túsindirip, saıysta sáttilik tiledi. Týrnır bastalardan buryn qatysýshylar tirkeýden ótip, arnaıy rettik nómirler aldy.
«Jarys úshin jaǵalaýdan radıýsy 200 metr bolatyn jer belgilendi, oǵan arnaıy jalaýshalar qoıylyp, týrnır qatań túrde osy radıýs aýmaǵynda ótkizildi. Talap boıynsha jarysqa qatysýshylardyń qoldanatyn qysqy quraldarynyń sany úshten aspaýǵa tıis, sondaı-aq jemniń kez kelgen túrin qoldanýǵa jáne balyqty azyqtandyrýǵa ruqsat etildi. Jarys aıaqtaldy degen belgi berilgen sátte qatysýshylar aýlaryn sýdan shyǵaryp, nátıjesin kópshilik aldynda kórsetip, qorytyndysyn hattamaǵa engizdik. Oryndardy bólý aýlanǵan balyqtyń jalpy salmaǵy boıynsha belgilendi. Jarys qorytyndysynda negizinen qarmaqqa alabuǵa kóp tústi, tek bir adam ǵana kókserke balyǵyn alyp shyqty. Osy týrnırde jalpy salmaǵy 3,7 kg balyq aýlandy», dedi týrnırdi uıymdastyrýshylardyń biri, jarystyń bas tóreshisi Maksım Koshkın.
Jarysqa qatysýshylardyń jasyna shekteý qoıylǵan joq. Tipti jalǵyz ózi emes, otbasymen birge qatysqandar da bar. Máselen, aýdan turǵyny Jánibek Smaǵulov jarysqa ulymen birge kelgen.
«О́zim de, balam da balyq aýlaǵandy jaqsy kóremiz. Biz ony qystyń shyńyltyr aıazynda taza aýadaǵy belsendi demalys dep sanaımyz. Búgin 30 metr tereńdikke qarmaq laqtyryp, balyq aýladyq. Eń alǵashqy balyq meniń qarmaǵyma tústi. Kóńil kúıimiz keremet, biz úshin tamasha demalys boldy», deıdi jeńimpazdardyń biri J.Smaǵulov.
Jarys qorytyndysy boıynsha 1 kg 150 gr balyq aýlaǵan Abaı oblysy Úrjar aýdanynyń turǵyny Qalıbek Ersin birinshi oryndy ıelendi. Al ekinshi jáne úshinshi oryndar úsharaldyqtar Oksana Fılonova men Iаroslav Ivanovqa berildi. Sol sııaqty «Eń birinshi aýlanǵan balyq», «Eń birinshi aýlanǵan alabuǵa», «Eń birinshi aýlanǵan kókserke», «Eń kishkentaı balyq» atalymdary boıynsha qarmaǵy qara sýdan bos qaıtpaǵandar da marapattaldy. Eń alǵashqy balyq ta, eń alǵashqy alabuǵa da Jánibek Smaǵulovtyń qarmaǵyna ilikken. Al eń alǵashqy kókserkeni Vasılıı Sýslov aýlasa, eń kishkentaı balyq Almaty oblysynyń turǵyny Jomart Sársenbekovtiń qarmaǵyna túsipti.
Atap ótsek, aýlanǵan eń iri alabuǵa balyǵynyń salmaǵy 500 grammnan assa, eń kishkenesiniń salmaǵy – 85 gramm. Jeńimpazdar men júldegerlerge aýdan ákimdiginiń alǵyshaty men týrnırge demeýshilik kórsetken «Prıchal» dúkeni men «Nık Oıl» JShS mekemesiniń arnaıy syı-sııapattary tabys etildi.
Jalpy, muz asty balyq aýlaý týrnıri Alakól jaǵalaýynda bıyl alǵash ret ótkizilip otyr. Bul is-shara salamatty ómir saltyn nasıhattaý, Alakól kóline degen halyqtyń yqylasyn arttyrý maqsatynda júzege asqan. Qatysýshylardyń qyzyǵýshylyǵynyń kóptigine baılanysty týrnır aldaǵy jyldary da jalǵasady degen jospar bar.
Jetisý oblysy