Memleket basshysy Qarjylyq monıtorıng agenttiginiń tóraǵasy Dmıtrıı Malahovty qabyldady, dep jazady Egemen.kz Aqordanyń baspasóz qyzmetine silteme jasap.
Qasym-Jomart Toqaevqa Qarjylyq monıtorıng agenttiginiń byltyrǵy atqarǵan jumysynyń qorytyndysy men aldaǵy kezeńge arnalǵan jospary jóninde baıandaldy.
Dmıtrıı Malahovtyń aıtýynsha, qylmystyq jolmen túsken kiristerdi jylystatýǵa qarsy kúres salasynda 5,7 myńnan astam tutynýshymen iskerlik qarym-qatynas toqtatylǵan. Krıptovalıýta aıyrbastaıtyn 1,5 myńnan asa zańsyz onlaın-servıs anyqtalyp, buǵattalǵan. 49 zańsyz maıner áshkerelengen. Qazir olarǵa qatysty tekserý jumystary júrgizilip jatyr. Terrorıstik jáne ekstremıstik uıymdardyń shottaryna qarjy aýdarýǵa qatysty 1,2 myń áreket anyqtalyp, olarǵa shekteý qoıyldy.
Memleket basshysyna 41 qarjy pıramıdasynyń joıylǵany, zardap shekkenderge 4,6 mıllıard teńge qaıtarylǵany jóninde málimet berildi. Alaıaqtyq belgileri bar 8 myńnan astam saıt pen akkaýnt buǵattalyp, 4,8 myń onlaın-kazıno saıtynyń qyzmeti toqtatyldy. Ekinshi deńgeıli banktermen jáne qarjy retteýshilerimen birlesip, 21 jasqa tolmaǵan azamattardyń býkmekerlik keńselerge tólem jasaý múmkindigin avtomatty túrde shekteý tetigi engizilip jatyr.
Budan bólek, Prezıdentke agenttik 74 mıllıard teńge kóleminde negizsiz bıýdjet shyǵyndarynyń aldyn alǵany, zańsyz qolma-qol aqshamen aınalysatyn 59 «kóleńkeli» alań qyzmetiniń toqtatylǵany, 7 uıymdasqan qylmystyq toptyń joıylǵany, sotqa deıingi tergeý amaldarynyń aıasynda 141 mıllıard teńge kóleminde keltirilgen zalaldyń ótelgeni jóninde esep berildi. Sondaı-aq kapıtaldy zańsyz shyǵarýǵa qarsy is-qımyl salasynda jalpy somasy 276 mıllıard teńgeni quraıtyn aktıvter qaıtarylǵan.
Qarjylyq monıtorıng agenttigi aldaǵy ýaqytta zańsyz shyǵarylǵan aktıvterdi qaıtarý jáne adal kásipkerlerdiń isine aralaspaı, «kóleńkeli» ekonomıkadaǵy qylmystardyń jolyn kesý jumystaryna basa mán beredi. Sonymen qatar Qarjylyq monıtorıngti damytý tujyrymdamasyn jáne Kóleńkeli ekonomıkaǵa qarsy is-qımyl jónindegi keshendi jospardy júzege asyrý, jylystatý júıesin FATF (aqshany jylystatýǵa qarsy kúrestiń qarjylyq sharalaryn ázirleý toby) halyqaralyq standarttaryna tolyq sáıkestendirý úshin sharalar qabyldanady.
Qasym-Jomart Toqaev adal bıznesti qorǵaý sharalaryn kúsheıtý qajet ekenin erekshe atap ótip, Agenttik qyzmetiniń negizgi baǵyttary boıynsha jumystardy jalǵastyrýdy tapsyrdy.