Bul jóninde Senat Spıkeri Máýlen Áshimbaev Palata otyrysynda aıtty. Otyrys barysynda depýtattar Jaıyq ózeniniń ekologııalyq ahýaly jáne ondaǵy sý aǵynynyń azaıýyna qatysty máseleni kóterip, Sý resýrstary jáne ırrıgasııa birinshi vıse-mınıstri Bolat Beknııazǵa saýal qoıdy, dep jazady Egemen.kz joǵarǵy Palatanyń baspasóz qyzmetine silteme jasap.
Osyǵan oraı Palata Tóraǵasy bul baǵytta Memleket basshysy júktegen naqty mindetter bar ekenin nazarǵa alyp, tıisti vedomstvony belsendilik tanytýǵa shaqyrdy.
«Prezıdent Qasym-Jomart Toqaev Jaıyq ózenine qatysty naqty tapsyrmalar bergeni belgili. Sondyqtan osy baǵyttaǵy jumystardy Reseımen dáıekti jáne tabandy túrde jalǵastyrý kerek. Halyq júzege asyrylyp jatqan sharalardyń naqty nátıjelerin kórýi qajet. Aldaǵy ýaqytta osy baǵyttarda naqty ári júıeli jumys júrgizesizder dep senemiz», dedi Máýlen Áshimbaev.
Senattyń búgingi otyrysynda depýtattar «Halyqaralyq sý aǵyndaryn keme qatynasynan basqasha paıdalaný túrleriniń quqyǵy týraly konvensııany ratıfıkasııalaý týraly» zańdy qarap, maquldady. Zańnyń normalaryna sáıkes memleketter óz aýmaǵynda halyqaralyq sý aǵynyn paıdalanǵan kezde basqa elderge zalal keltirýdiń aldyn alý úshin tıisti sharalar qabyldaýǵa mindettenedi.