Dýbaıda ótip jatqan júlde qory 2 941 785 dollardy quraǵan ATR týrnırinde Qazaqstannyń tennısshisi Aleksandr Býblık sátti óner kórsetip jatyr.
Alǵashqy aınalymda chehııalyq Tomash Mahachtan basym túsken ol ekinshi kezeńde Tallon Grıkspýrmen kúsh synasty. Álemdik reıtıngte 28-orynda turǵan nıderlandtyq oıynshy Aleksandrdy biraz ábigerge saldy. Eki sette taı-breıkke ulasty. Desek te sheshýshi tusta shıraq qımyldaǵan jerlesimiz 7:6, 7:6 esebimen jeńiske jetti. 1/8 fınalda Býblık 22 jastaǵy Irjı Legechkamen sheberlik baıqasady. ATR tiziminde 34-satyǵa jaıǵasqan chehııalyq oıynshy keshe oıda-joqta álemniń 15-raketkasy, reseılik Karen Hachanovty qapy qaldyrdy. Esep – 6:7, 7:6, 6:4.
AQSh-ta ótken úsh birdeı jarysta jeńimpaz atanǵan Dmıtrıı Popko Argentınanyń Týkýman qalasyndaǵy týrnırdi de sátti bastady. Alǵashqy aınalymda ol Gonsalo Seıtýnge 6:1, 6:3 esebimen san soqtyrdy. Osylaısha, Popko qatarynan 16 básekede basymdyq tanytty.