Keıingi ýaqytta Jetisýda 40 joba iske asyrylǵan. Olardyń qatarynda toqyma, kún panelderi, qurylys buıymdarynyń óndirisi bar. Odan bólek qazir óńirde energııa tapshylyǵyn joıý máselisi ózekti bolyp otyr.
«Jasyl» energııa basymdyq berý Jetisý óńirinde júıeli júzege asyp jatyr. Oǵan oblys ákimi Beıbit Isabaevtyń «jasyl» energııa salasyndaǵy iri jobany iske asyrýǵa nıetti ınvestor kompanııalardyń ókilderimen kezdesýi dálel. Qazaqstan Respýblıkasy men Birikken Arab Ámirlikteri Birikken Ulttar Uıymynyń klımattyń ózgerýi jónindegi negizdemelik konvensııasy taraptarynyń 28-konferensııasy aıasynda Jetisý oblysynda jel elektr stansasynyń jobasyn iske asyrý týraly úkimetaralyq kelisim jasaǵan. Qýaty 1 GVt jel elektr stansasy Jońǵar qaqpasynda salynady dep josparlanǵan. Bul atalǵan saladaǵy jańa múmkindikterdi arttyrary sózsiz.
Byltyr óńirde elektr energııasyn tutyný 218 MVt boldy. Onyń ishinde JEK úlesi – 93,5 MVt nemese qolda bar qýattyń shamamen 43 paıyzy. Kezdesýde oblys basshysy óńirdiń ınvestısııalyq múmkindikterimen qosa sý, jel jáne kún energııasy jaǵynan áleýeti zor ekenin aıtty. Sonymen qatar ınvestorlar úshin barlyq jaǵdaı qarastyrylǵanyn jetkizdi.
«Byltyr Memleket basshysy Qasym-Jomart Toqaev «ACWA POWER» kompanııasy dırektorlar keńesiniń tóraǵasymen kezdesip, kelisimge, jol kartasyna qol qoıdy. Biz óz tarapymyzdan Alakól aýdany ákimdiginiń qaýlysymen jer ýchaskesin belgilep, tıisti jumysty atqardyq. Bul óte aýqymdy ári jaýapty joba bolǵandyqtan, sizdiń kompanııa mamandary sol aımaqqa baryp, belgilengen jer ýchaskelerin zerttep, zerdelegeni jón bolady. Jel týrbınalary men qajetti jabdyqtardyń qalaı, qaıda ornatylatynyn naqty anyqtap, jemisti jumys júrgizýge jaýapkershilikpen qaraýy kerek. Bul jobaǵa asa muqııat kóńil bólgen durys», dedi oblys ákimi B.Isabaev.
«ACWA POWER» kompanııasynyń TMD-daǵy bıznesti damytý jónindegi vıse-prezıdenti Djaı Prakash usynysty qýana qabyl alyp, aldaǵy jumys josparyn jer tańdaý máselesinen bastaıtynyn aıtty. Bul jumystar aýa raıyna baılanysty kóktem mezgiline josparlandy.
Kezdesýge qatysýshylar óńirdiń ekonomıkasyna 883 mlrd teńgeden astam ınvestısııa salynatyn osy irgeli jobany iske asyrý jumystaryn talqylady. Oblys ákimdigi tarapynan zańdy túrde qajetti qoldaý kórsetiletinin aıtqan aımaq basshysy úkimettik deńgeıdegi jobany iske asyrý úderisin jedeldetý qajettigin aıtyp, jıyndy qorytyndylady.
Jetisý oblysy