Almatydaǵy Memlekettik Ortalyq mýzeıde Alǵys aıtý kúnine oraı «Bir shańyraq astynda» dep atalǵan mádenı is-shara ótti. Taǵylymdy basqosýǵa kelgen túrli etnos ókilderi taǵdyrdyń qıly soqpaǵynda baýyryna basqan qazaq halqyna alǵystaryn aıtyp, dostyq pen tatýlyqty arqaý etken mýzykalyq týyndylardan konsert usyndy.
Atalǵan is-sharaǵa Almaty qalasyndaǵy Respýblıkalyq Dostyq úıine qarasty «Vatandash» qyrym tatarlarynyń mádenı ortalyǵy, Qazaqstan kúrdteriniń «Barbang» qaýymdastyǵy, «Renessans» Almaty mádenı-etnıkalyq qoǵamy, «Venz» polıak mádenıetiniń ortalyǵy», Almaty oblysynyń «Vaınah» sheshen-ıngýsh birlestigi, «Voshal» ıngýsh etno-mádenı ortalyǵy» t.b etno-mádenı birlestikterdiń ókilderi qatysty.
Is-shara aıasynda uıymdastyrylǵan halyqtyq-qoldanbaly óner kórmesi kópshilikti tánti etti. Jınalǵandar mýzeı qabyrǵasyndaǵy tarıhı jádigerlerdi tamashalap, ár etnos ózderiniń halyqtyq mádenı dástúrlerinen syr shertti.
Alǵys aıtý kúni – eń aldymen elimizde tynyshtyq, ózara senimdilik pen Qazaq eline degen qurmettiń ornyǵýyna negiz bolǵan Prezıdenttiń beıbitshilik pen kelisim saıasatynyń saltanatty sımvoly ekenin alǵa tartqan QHA-músheleri ıgi sharaǵa uıytqy bolǵan mýzeı ujymyna rızashylyǵyn bildirdi.
«Bizdiń mýzeıdiń qorynda, tarıhtaǵy kúrdeli kezeńderde qazaq jerine kelip pana tapqan san taraý taǵdyrlardyń ómir tynysynan habar beretin birshama jádigerler saqtalǵan. Olardy jınaqtaýǵa sol tustaǵy mýzeı basshylary kóp eńbek sińirgen. Atalǵan jádigerlerdi bıyl arnaıy jasaqtalatyn ekspozısııalyq zalǵa ornalastyrýdy kózdep otyrmyz. Búgingi sharanyń maqsaty – qazaq jerindegi kóptegen etnostardyń yntymaǵyn odan ári nyǵaıtyp, tatýlyqty tý etken otandastarymyzdyń tarıhtaǵy beınesine bir sát úńilý hám ótkenge salaýat aıtý. Ári búgingi basqosý Mádenıet jáne aqparat mınıstrligi bastap bergen ıgi chellenjdi qoldaý baǵytynda uıymdastyrylyp otyr.
Halqymyz qıyn-qystaý zamanda ózgelerdiń basyna túsken aýyrtpalyqty qaıyspaı birge kótere bildi, bul búgingi tańda elimizdegi túrli ult ókilderiniń arasyndaǵy adamgershilik qarym-qatynastyń ónegeli ólshemine aınaldy», deıdi QR Memlekettik Ortalyq mýzeıiniń dırektory Rashıda Harıpova.
Mádenı-tanymdyq is-sharada túrli etnostardyń ulttyq kıimderi kópshilik nazaryna usynylyp, jınalǵandar kesh taqyrybyn aıshyqtaǵan áserli beınerolıkti birge tamashalady.