Áıeli Saltanat Núkenovany asa qatygezdikpen óltirdi degen kúdikke ilingen eks-mınıstr Qýandyq Bıshimbaevtyń ákesi Ýálıhan Bıshimbaev BAQ ókilderine suhbat berip, el azamattaryn dúr silkindirgen rezonansty is tóńireginde shyqqan aqparattar jaıly pikir bildirip, qoǵamdy alańdatyp jatqan suraqtarǵa jaýap berdi, dep habarlaıdy Egemen.kz.
Jaqynda Qýandyq Bıshimbaevtyń qorǵaýshylary YouTube platformasynda tikeleı efırge shyǵyp, kúdikti qylmys jasaǵanyn moıyndamaı otyrǵanyn jetkizgen edi. Odan bólek advokat Nazken Qusaıynova Saltanattyń denesinde aýyr jaraqat izderi bolmaǵanyn aıtyp, Bıshimbaev áıeliniń qazasyna baılanysty qaıǵyryp otyrǵanyn alǵa tartty.
Advokattardyń málimdemesine narazylyq bildirgen marqumnyń týystary men el azamattaryn tolǵandyrǵan suraqtar jaýapsyz qaldy. Qoǵamda «Bıshimbaevty aqtaý naýqany» júrip jatqany ras pa? Kúdiktiniń advokattarynan suhbat alǵan jýrnalısterge, jelide pikir qaldyrǵan saıasatkerlerge, blogerlerge aqsha tólendi me? Bıshimbaevtar otbasy balasyn aqtap alǵysy kele me?
Osy oraıda Nege.kz saıtyna suhbat bergen Ýálıhan Bıshimbaev munyń bári qoǵam sanasyn manıpýlıasııalaý úshin jasalyp jatqanyn aıtty. Onyń aıtýynsha, balasyna qatysty qozǵalǵan qylmystyq is sotta ádil qaralýy kerek, ıaǵnı bári zańdy bolýy kerek.
El arasynda «Gúljan Erǵalıevaǵa (Elmedia) Qýandyq Bıshimbaevtyń advokattarymen júrgizgen suhbaty úshin 10 mln teńge berilgen», sondaı-aq E.Ertisbaevqa 100 mln, bloger Gúlbaný Ábenovaǵa 10 post úshin 15 mln teńge tólengen» degen sybys jeldeı esip júr. Tipti keıbireýler «Bıshimbaevtar otbasy bul naýqanǵa 1 mln dollar jumsaǵan» deıdi. Ýálıhan Bıshimbaev bul aqparattardy teriske shyǵardy.
«Kim ne aıtsa da, óz erki. Onyń bári jalǵan áńgime. Ekinshiden, bul mıǵa kirmeıtin feık aqparat. Tipti, osyny aıtyp júrgenderdi sotqa berýge bolady. Kim durys aıtady, kim burys aıtady, ony Alla bilip otyr. Qaıtse de, bizge kúıe jaǵýshylardyń shyǵaryp alǵany. Munyń bári – provokasııa», dedi Bıshimbaevtyń ákesi.
Al advokattardyń málimdemesine qatysty tilshiniń suraǵyna: «Usynys tússe, kimge suhbat beredi, ózderi biledi. Olar da óz jumysyn isteıdi ǵoı», dep qysqa qaıyrdy.
Sóz sońynda Ýálıhan Bıshimbaev bireýlerdi satyp alatyndaı múmkindigi joqtyǵyn tilge tıek etip, halyq arasynda júrgizilip jatqan aqparattyq naýqanǵa áýletiniń esh qatysy joq ekenin málimdedi.
«Balam – jas bala emes. 40-tan asqan azamat. Árıne, bárimizge qıyn, qatty soqqy boldy. Syrtymyzdan ártúrli nárse aıtyp jatyr. Áli kúnge deıin es jııa almaı júrmiz. Eń birinshi – kelinimizden aıyryldyq. Biz de qaıǵyryp otyrmyz. Kelinimiz ómirden ótti, balamyz mynandaı jaǵdaıǵa tap boldy. Jaǵdaıymyz máz emes. Eki jaqqa da zań ortaq. Bári zań sheńberinde ádiletti qaralýy kerek», dep túıindedi Ýálıhan Bıshimbaev.