Búgin, 11 naýryzda Astana qalasyndaǵy qylmystyq ister jónindegi mamandandyrylǵan aýdanaralyq sotta burynǵy ulttyq ekonomıka mınıstri Qýandyq Bıshimbaevtyń isi boıynsha aldyn ala sot otyrysy ótip jatyr, dep habarlaıdy Egemen.kz.
Aıta ketsek, BAQ ókilderi sot zalyna kire almady. Jýrnalıster úshin monıtor arqyly tikeleı kórsetilim uıymdastyryldy.
Aldyn ala otyrys barysynda prokýror birneshe málimdeme jasady:
Qýandyq Bıshimbaev pen Saltanat Núkenova arasyndaǵy neke resmı tirkelmegen; Bıshimbaev Saltanat Núkenovanyń barlyq telefon qońyraýlaryn baqylap, oǵan jumys isteýge tyıym salyp, qarjy jaǵynan táýeldi etken; Áıelin qyzǵanǵan Bıshimbaev oǵan júıeli túrde fızıkalyq zorlyq-zombylyq kórsetken; 2023 jylǵy naýryz aıynyń ortasynda Bıshimbaev Núkenovany soqqyǵa jyqqan; Saltanat Núkenova aǵasyna shaǵymdandy. Ol ony Bıshimbaevpen ajyrasýǵa kóndirdi, biraq Núkenova ajyrasýdan bas tartty; 2023 jyldyń jazynda Bıshimbaev Núkenovaǵa Astanadan Almatyǵa kóshýdi usyndy. Ol zorlyq-zombylyq toqtaıdy degen úmitpen kelisti. Alaıda kúıeýi kúsh kórsetýdi jalǵastyrǵan.Prokýrordyń aıtýynsha, qastandyq jasalǵan kúni Qýandyq Bıshimbaev pen Saltanat Núkenova konsertte bolǵan. Aradaǵy janjal sol jerde bastalyp, meıramhanada jalǵasty. Núkenova Bıshimbaevtan ketkisi keletinin aıtty, bul týraly aǵasyna da habarlaǵan.
Bıshimbaev mas kúıinde Núkenovany soqqyǵa jyǵyp, basyna zaqym keltirdi, keıin ony aıaǵymen tepkileı bastady. Jábirlenýshi meıramhanadaǵy bólmelerdiń birinde jabyldy, biraq Bıshimbaev esikti soǵyp, oǵan qaıtadan qol kótergen.
Memlekettik aıyptaýshy atap ótkendeı, Núkenova birneshe ret esin jıyp, óz-ózine kelgen, alaıda eks-mınıstr ony uryp-soǵýdy jalǵastyrǵan.