Astanada Qazaqstandyq blokcheın-tehnologııalar jáne data-ortalyqtar qaýymdastyǵynyń Basqarma tóraǵasy Dáýren Qarashev pen CANAAN CONVEY vıse-prezıdenti Devıs Hýeıdiń kezdesýi ótti, dep jazady Egemen.kz.
Kezdesý barysynda taraptar kompanııanyń Qazaqstandyq blokcheın-tehnologııalar jáne data-ortalyqtar qaýymdastyǵynyń músheligine kirýi týraly shartqa qol qoıdy.
CANAAN CONVEY vıse-prezıdenti Devıs Hýeı qazaqstandyq sıfrlyq maınerler naryǵy CANAAN CONVEY úshin tartymdy ekenin erekshe atap ótip, Qazaqstan Ortalyq Azııa óńirindegi negizgi krıptohabqa aınalýy múmkin ekenine senim bildirdi.
Kezdesýde otandyq maınerlerdiń sıfrlyq maınıngke arnalǵan jabdyqtaryn sapaly jańartý, «halvıng» qarsańynda olardyń jumysynyń tıimdiligin jaqsartý, bir mezgilde kómirtegi izin azaıta otyryp, energııa tıimdiligin arttyrý salasyndaǵy yntymaqtastyq máseleleri talqylandy.
QBTQ basshysy Dáýren Qarashev búgingi tańda Qaýymdastyqtyń tikeleı qatysýymen zańnamalyq negiz qurylǵanyn, oǵan sáıkes sıfrlyq maınerler endi elimizdiń energııa júıesine qandaı da bir qaýip tóndirmeıtinin, kerisinshe, elektr energııasyna suranys týǵyzatyn, sondaı-aq energııa júıesin teńgerimdeýge, onyń ornyqty ári irkilissiz jumys isteýine járdemdesetin turaqty jáne tólem qabiletti tutynýshylar bolyp sanalatynyn atap ótti.
«Biz úshin jasyl energetıkaǵa basymdyq bere otyryp, sıfrlyq maınerlerdi úzdiksiz elektr energııasymen qamtamasyz etý, sıfrlyq maınıngke arnalǵan eń jańa jabdyqtardy paıdalaný esebinen kómirtegi izin qysqartý asa mańyzdy. Qaýymdastyǵymyzdyń músheleri, elimizdiń eń iri sıfrlyq maınerleri úshin CANAAN CONVEY sııaqty álemdik deńgeıdegi kompanııamen yntymaqtastyq ornatý strategııalyq jetistik sanalady», dedi Dáýren Qarashev.
CANAAN CONVEY CO., LTD. 2013 jyly Qytaıda qurylǵan. Ol blokcheın-serverlerdi óndirýde jáne ASIC mıkroprosessorlyq sheshimderin ázirleýde álemdik kóshbasshylardyń biri bolyp tabylady.