Ulttyq ǵylym akademııasy janyndaǵy Jas ǵalymdar keńesi tóralqasynyń birinshi jumys otyrysy ótti. Jıynǵa tóralqa músheleri men Ulttyq ǵylym akademııasynyń vıse-prezıdenti, belgili ǵalym Dos Sarbasov, Parlament Májilisi Áleýmettik-mádenı damý komıtetiniń tóraǵasy Ashat Aımaǵambetov qatysty. Otyrysta Jas ǵalymdar keńesi «Ǵylym jáne tehnologııalyq saıasat týraly» zań jobasyna «jas ǵalym» mártebesin engizýdi jáne otandyq ǵylymnyń máselelerin sheshýge baǵyttalǵan basqa da normalar bekitýdi usyndy.
Jıynda sóz alǵan Májilis depýtaty A.Aımaǵambetov keńestiń qurylýymen quttyqtaı kele, qazirgi kezde qarastyrylyp jatqan ǵylymǵa qatysty úsh birdeı zań jobasy týraly atap ótti.
– Akademııa janynan qurylǵan Jas ǵalymdar keńesiniń alǵashqy otyrysy ǵylymǵa qatysty zań jobalaryna beriletin usynystarǵa qatysty eken. Osy tusta qazir otandyq ǵylymdy damytýǵa qatysty úsh birdeı zań jobasy talqylanyp jatyr. Sonyń ekeýi Senat pen Májilis depýtattarynyń bastamasymen ázirlendi. Al úshinshisi – salalyq mınıstrlik daıyndaǵan «Ǵylym jáne tehnologııalyq saıasat» zań jobasy. Men osy zań jobalarynyń alǵashqy ekeýine toqtalǵym keledi. Birinshi zań jobasynda Salyq kodeksine kásipkerlerdiń ǵylym salasyna ınvestısııa jasaý belsendiligin arttyrý men zertteýlerdiń nátıjelerin óndiriske engizilýin yntalandyrý úshin arnaıy túzetýler daıyndaldy. Munda zertteý ýnıversıtetteriniń janynan ǵylymı ortalyqtar ashý jáne tájirıbelik-konstrýktorlyq jumystardy oryndaý úshin jumsalǵan qarajattyń 100%-yn salyqtyq shegerimge jatqyzý, jeke kompanııa úshin tájirıbelik-konstrýktorlyq jumystarǵa jumsalǵan shyǵystar boıynsha salyq salynatyn sommasyn 50%-ǵa tómendetý usynyldy, – dedi depýtat. A.Aımaǵambetovtiń aıtýynsha, ekinshi zań jobasynda ǵalymdar úshin jańa ústemeaqy engizý, shyǵarmashylyq demalys berý, jer qoınaýyn paıdalaný sýbektileriniń zertteýlerge 1% qarajatyn tıimdi bólý, ınstıtýttardy tikeleı qarjylandyrý múmkindigin keńeıtý sııaqty mańyzdy normalar qabyldandy. Munda zań jobasynda Ǵylymı-pedagogıkalyq qyzmetkerler úshin shyǵarmashylyq demalys (Sabbatical) engizildi. Osy bastama aıasynda qyzmetkerler ortasha jalaqy kólemindegi tólemderdi saqtaı otyryp, bir jylǵa deıin shyǵarmashylyq demalys alýǵa ótinish bere alady.
Akademııa janynan qurylǵan Jas ǵalymdar keńesiniń tóraǵasy Maqsat Jabaǵın dál sol úshinshi, ıaǵnı «Ǵylym jáne tehnologııalyq saıasat týraly» zańynyń jobasyna ózgerister nemese tolyqtyrýlar boıynsha usynystar berýdi kún tártibiniń basty máselesi retinde atady.
– Jas ǵalymdar keńesi depýtattarǵa zań jobasyna halyqaralyq ǵylymı praktıka standarttaryna sáıkes keletin «jas ǵalym» uǵymyn engizýdi usynady. Búginde bul uǵym «Ǵylym týraly» zańda jáne basqa da zańǵa táýeldi aktilerde anyqtaýsyz qoldanylady. The World Association of Young Scientists halyqaralyq jas ǵalymdar qaýymdastyǵy óz músheleriniń jasyn 40 jasta anyqtaıdy. Osy halyqaralyq tájirıbege súıenip jáne jahandyq úrdisterdi, otandyq tájirıbeni eskerip, jańa zańda «Jas ǵalym – 40 jasqa (qosa alǵanda) deıingi (ómir jáne densaýlyq ǵylymdary úshin 44 jasqa deıingi), PhD dárejesin alǵannan keıingi 10 jyldan aspaıtyn ǵylymı-pedagogıkalyq qyzmet ótili bar, ǵylymı zertteýlerdi júzege asyratyn, ǵylymı jáne (nemese) ǵylymı-tehnıkalyq qyzmettiń nátıjelerin alatyn (analar men jalǵyzbasty ákeler úshin árbir balaǵa 18 aıdan aspaıtyn bala kútimi jónindegi kezeńdi esepke almaǵanda) ıa ózge de tanylǵan balamasy bar jeke tulǵa» degen anyqtamany engizýdi usynamyz, – dedi M.Jabaǵın.
Keńes músheleri ǵylymdy basqarýdaǵy máselelerdi sheshýge, memlekettik ǵylymı-tehnıkalyq saraptama júrgizý merzimin jyldan-jylǵa sozbaý, sonyń saldarynan ǵylymı jobalar men baǵdarlamalardy ýaqtyly qarjylandyrmaý sııaqty máselelerdi sheshýge arnalǵan basqa da usynystaryn jetkizdi. Sondaı-aq «Ǵylym jáne tehnologııalyq saıasat týraly» zań jobasyna Ulttyq ǵylym akademııasynyń quzyretin 11-tarmaǵymen tolyqtyrý usynyldy. Bul norma Memleket basshysynyń Prezıdent janyndaǵy Ulttyq ǵylym akademııasynyń qyzmetine jas ǵalymdardy tartý jónindegi tapsyrmasyna saı keledi jáne jas ǵalymdardyń bastamalaryn iske asyrýǵa múmkindik beredi.