Adam aıtsa nanǵysyz nárseler bolady. Bizdiń úıge birinshi bolyp Oljastyń kitaby kirdi. Onyń Alashtan at ozdyrǵan zańǵar zamandastary Muqaǵalı, Tólegen, Qadyr, Tumanbaılardyń jazǵandaryn oń-solymdy aıyrǵan tusta oqydym. Qalyń qumnyń arasyndaǵy qazaq aýylynda ósken bul paqyryńyz onda orysshańyzdy múldem bilmeıtin. Qazir de qatyrǵanymyz shamaly.
Bastaýysh mektepte oqyp júrgenimde ájem dúkennen eki kitap ákeldi. Satýshylar alǵan zatyna «tirkeme» retinde qosyp beripti. Biri – Oljas Súleımenovtiń «Glınıanaıa knıgasy», ekinshisi, Medeýbaı Qurmanov aýdarǵan Geteniń «Faýsty». Bulardy jeke kitaphanamnyń tólbasy deýge de bolady. «Faýsty» keıin nemis tilinen sabaq bergen Kúltaı Kópirbaeva apaıymyz at-túıedeı qalap aldy. Al «Jazýshy» baspasynan 1969 jyly jaryq kórgen «Glınıanaıa knıga» áli kúnge deıin tórimde tur.
Meniń bir sýretshi naǵashym bar edi. О́zi KazPI-diń kórkemsýret-keskindeme fakýltetin bitirgen. Topyraǵyń torqa bolǵyr sol Ǵaıys aǵam Oljas óleńderimen «aýyratyn». Atyshýly «Az ı Iа»-ny alǵash osy kisiniń qolynan kórdim. Jampoz aqynnyń jyrlaryn jatqa soǵatyn. Ultjandylyǵyn aıtqanda arqalanyp ketetin.
Birte-birte ózimiz de onyń óleńderin oqı bastadyq. Túsingenimizden túsinbeıtin tustarymyz kóp. Ne qudireti baryn kim bilsin, báribir tartyp turady. Arman qýyp Almatyǵa barǵanymyzda, aldymen izdegen adamymyz Oljekeń boldy. Jazýshylar odaǵynyń esigin eki saǵat kúzetip, kórdim-aý aqyry asaý arǵymaqtaı arqyraǵan aqyndy. Túr-turpaty bólek, tulǵasy erek eken. Buǵan deıin teledıdardan talaı kórgendikten, jazbaı tanydym. Jalpy, ony eshkimmen shatastyrý múmkin emes.
Endigi arman – qoltańbasyn alý boldy. Almatydaǵy Lenın saraıynda ótken shyǵarmashylyq keshinen keıin qalyń kezekke turyp, kózdegen maqsatyma qol jetkizdim. Qolymdaǵy bloknotyma soıdaqtatyp qolyn qoıa saldy. Basqa eshteńe jazbady. Olaı etetindeı de bar. Aınalasyndaǵy alqalaǵan áleýmetten aıaq alyp júrgisiz-tuǵyn. Oqyrman – kóp, ol – jalǵyz.
Birde ol Ilııas Jansúgirovtiń uly Bolatpen birge aýylymyzǵa keldi. Sonda kóshede jalǵyz ketip bara jatqanyn kórdim. Syrtynan qyzyǵa qaradym. Alaıda aldynan shyǵyp sálem berýge batylym barmaǵanyna áli kúnge ókinemin.
... Anaý jyly Astanada ótken Azııa jazýshylarynyń alqaly jıynyna jan-jaqtan nebir jaqsy-jaısańdar jınalǵany belgili. Oljas aǵamyzdyń osynaý aıǵyr toptyń ortasynda júrgenin aldyn ala bilgendikten, áıgili «Qysh kitabyn» qoltyǵyma qystyra bardym. Ońashalaý otyrǵan bir sátin paıdalanyp, janyna jetip bardym da:
– Aǵa, mynaý menen segiz jas qana kishi kitap. Qımas qazynamdaı qymbat dúnıe. Osyǵan qoltańbańyzdy qoıyp berseńiz qaıtedi, – dedim. О́zimshe oılap qoıamyn: «Qansha jerden shirenseń de, ishiń jek kórmes. Dál qazir bul kitap eshkimniń qolynan tabyla qoımasy anyq. Endeshe, elp etpeı kór».
Qatty qatelesippin. Eptep jymıǵany bolmasa, emirengen syńaı tanytpady. Aty-jónimdi de suraǵan joq. Ataǵyn aspandatqan kitabynyń betin ashty da, ún-túnsiz qolyn qoıa saldy. Bitti.
О́rekpigen kóńilimiz sý sepkendeı basylsa da, ór tulǵaǵa ókpelemedik.
...Ol Oljas qoı!