21-22 naýryz aralyǵynda «QazExpoCongress» ulttyq kompanııasy elorda turǵyndary men qonaqtaryn Ulystyń uly kúnin EXPO kesheniniń aýmaǵynda toılaýǵa shaqyrady. Áz-Naýryz merekesine oraı aýmaqta túrli-tústi dekorasııamen bezendirilgen qazaq aýyly uıymdastyrylady. Onda sheberler óz buıymdaryn usynady, alańda altybaqan qurylady, dep habarlaıdy Egemen.kz.
Bolashaq energııasy murajaıynda da mazmundy mádenı-oıyn-saýyq baǵdarlamasy josparlanǵan. Munda «Art Dombyra» trıosy, «Qosalqa» kvınteti, «Tarlan» dombyrashylar ansambli, «Qorqyt» etno-ansambli, aıtyskerler, ánshiler, bı ujymdary óner kórsetedi. Al teatr trýppasy «Áz-Naýryz – jyl basy» mıýzıklin qoıady. Sonymen qatar murajaı alańynda qazaqtyń palýany Sergeı Syrýlnıkov kúsh ızometrııasyn kórsetedi. Sondaı-aq murajaıda kıizden sýret jasaý jáne qoldan kilem toqý boıynsha sheberlik klastary ótkiziledi, al qolónershiler kádesyılar, kıim-keshekter, qoldan jasalǵan ydys-aıaqtaryn jáne taǵy basqa da buıymdaryn satylymǵa qoıady. Bul kúni qonaqtar dástúrli merekelik taǵam – Naýryz kóje men baýyrsaqtan dám tata alady. 21-23 naýryz aralyǵynda murajaıǵa bıletterdi 50% jeńildikpen satyp alýǵa bolatynyn atap ótken jón.
21-23 naýryz aralyǵynda EXPO halyqaralyq kórme ortalyǵynda «Naýryz bazary» shyǵys jármeńkesi ótedi. Munda Qazaqstan óndirýshileri azyq-túlikten bastap, toqyma buıymdaryna deıingi taýarlaryn arnaıy merekelik baǵamen saýdalaıdy. Jármeńkege Qazaqstan, Túrkııa, Iran, Ázerbaıjan, Tájikstan, Qyrǵyzstan jáne basqa da shet elderdiń úzdik sheberleri men qolónershileri qatysady.