19-21 naýryz aralyǵynda Lıvannyń bas shahary Beırýtte ústel tennısinen «WTT Feeder Beirut 2024» dep atalatyn halyqaralyq týrnıriniń jalaýy jelbireıdi.
20 memleketten kelgen 120-ǵa tarta sportshynyń qatysýymen ótetin dúbirli dodada Qazaqstannyń 10 óreni óner kórsetedi. Olar – Aıdos Kenjeǵulov, Sarvınoz Mirqadirova, Vladıslav Zaharov, Záýresh Aqasheva, Sanjar Jubanov, Ánel Baqyt, Eskendir Harkı, Angelına Romanovskaıa, Yrysbek Artyqmetov, Araı Áshkeeva. Esimderi atalǵan jerlesterimizdiń deni birqatar halyqaralyq dodaǵa qatysyp, úlken tájirıbe mektebinen ótti. Sondyqtan da jankúıerler Taıaý Shyǵystaǵy týrnırden otandastarymyz oljaly oralady dep úmittenip otyr.
Desek te bizdiń ústel tennısshilerimizdiń qarsylastary da azýly. О́zgelerdi aıtpaǵanda, Beırýttegi básekede Olımpııa oıyndarynyń komandalyq eseptegi qola jáne alty dúrkin álem chempıonatynyń júldegeri Dý Hoıkem (Gonkong), álem chempıonatynyń úsh dúrkin qola júldegeri, Azııa chempıony An Dje Hıon (Ońtústik Koreıa), Azııa chempıonatynyń on dúrkin júldegeri Chýan Chı-Iýan (Taıpeı), Azııa chempıonatynyń komandalyq eseptegi qola júldegerleri Harmıt Desaı, Manav Takkar, Satııan Gnanasekarıan (Úndistan) syndy sańlaqtar baq synaıdy.