15 naýryzda Memleket basshysynyń tóraǵalyǵymen Ulttyq quryltaıdyń úshinshi otyrysy ótti. Quryltaı barysynda Qasym-Jomart Toqaev ózekti áleýmettik máselelerdi kóterip, eldegi zııaly qaýym ókilderin aýyzbirshilikke shaqyrǵan edi. Osy oraıda Janarbek Áshimjan bastaǵan bir top depýtat úndeý jasady, dep habarlaıdy Egemen.kz.
«Ult bolyp uıysý, jurt bolyp jumylý jolynda zııaly qaýym ókilderiniń atqarar róli bólek. Kúni keshe Atyraýda ótken Ulttyq quryltaıda Memleket basshysy Qasym-Jomart Toqaev «Yntymaǵy jarasqan, ortaq maqsatqa uıysqan ult eshqashan utylmaıdy. Eldiń tutastyǵy zııaly qaýymnyń birliginen bastalady. El aǵalary aýyzbirshilikti jáne urpaqqa ónegeli bolýy kerek», dep ult zııalylaryna óz qaıyrylýyn jasady. Sol quryltaı tórinde meni qoǵamymyzda aıryqsha orny bar, sóz bastasa halyqty uıytar sheshen, kósh bastasa eldi erter kósem, rýhanııat álemindegi áıgili tulǵalardyń búgingi keskin-kelbeti men jaýapkershiligi qatty oılandyrdy. Osy oraıda «Qazaq oqyǵanyn syılaıdy, sońynan eredi. Qazaqty týra jolǵa bastaıtyny da, adastyratyny da oqyǵany» degen Júsipbek Aımaýytovtyń sózi oıǵa oralady. Qaı dáýirde de, qandaı tarıhı kezeńde de qoǵamnyń negizgi qozǵaýshy kúshi – zııalylar!», dep sózin bastady Janarbek Áshimjan.
Onyń aıtýynsha, keshegi Altyn Orda men búgingi Aq Ordaǵa deıin qazaq eliniń júrip ótken kúngeı-teriskeıli tarıhynda qara halyqqa jaryq syılap, jol nusqaǵan, úmitin úkilep, jiger bergen tulǵalar az emes.
«Rasynda, Maıqy bıdiń «Betege ketse – bel qalar, bekter ketse – el qalar, birligiń ketse – neń qalar» degen naqyly dál búgingi tańda tipti ómirsheń bolyp tur. Al esimi elge máshhúr búgingi keıbir tulǵalarymyz, aqsaqaldarymyz, tarıhshylarymyz, jazýshylarymyz aı-kúnniń amanynda bolary bolyp, boıaýy sińgen túrli oqıǵalar týraly aıtysyp, tartysyp, Alash kósemderi men keńes qaıratkerlerin qaǵystyryp, qyl aıaǵy Shyńǵys hannyń tegine talasyp óspeıtin eldiń balasyndaı ónbeıtin daýdy qýyp, «óletuǵyn taı úshin, kóshetuǵyn saı úshin» biriniń qoly biriniń jaǵasynda júrgen jaǵdaılardy aqparat quraldary men ádeýmettik jelilerde az kórip júrgen joqpyz. Prezıdent sony meńzese kerek», dedi depýtat.
Bul rette Janarbek Áshimjan ár tulǵanyń óz bıigi bar ekenin aıtyp, bir tulǵany kóterý arqyly ekinshi tulǵaǵa kóleńke túsirýdiń keregi joq ekenin tilge tıek etti.
«Turar Rysqulov pen Sultanbek Qojanovty, Sáken Seıfýllın men Alashordany, Maǵjan Jumabaev pen Sábıt Muqanovty, Dinmuhamed Qonaev pen Jumabek Táshenovti bir-birine qarsy qoıyp, eldiń ishin alataıdaı búldirip, bólip-jarý kimge qajet? Olardyń baǵy men soryn, bary men joǵyn jarystyrǵannan búgingi urpaqqa qandaı úlgi? Qandaı ónege? Barrıkadanyń qaı qaptalynda bolsa da qazaq eliniń táýelsizdigi jolynda barmaǵy shaınaýda, basy aıdaýda ketken tulǵalardyń bári óz aldyna bir-bir asqar taý! Árqaısynyń óz taǵdyry bar. О́z súıinishi, óz kúıinishi boldy. Olardyń kúres túrleri ártúrli bolǵanmen, túpki maqsat bir edi. Bári ulttyq murattar jolynda, qazaqtyń haqy úshin kúreste ómirlerin sarp etti. «Basyna as quıyp, sabyna qaraýyl qoıǵan» zamanda ult bolyp uıysyp, jurt bolyp jumylýdy kóksedi olar», dep spıker sózin jalǵastyrdy.
Ol óz sózinde el jaqsylary bir-birinen alystamaı, bir judyryqtaı jumylyp, qazaqtyń ulttyq murattaryn dáripteıtin zaman týǵanyn aıtty. Janarbek Áshimjannyń paıymynsha, Memleket basshysy quryltaı barysynda aıtqan ónegeli sózder el aǵalary úshin uran bolýy qajet.
«Prezıdenttiń Atyraý alabynda aıtqan «Elimizde kózi ashyq, kókiregi oıaý, bilimdi jastar kóp! Olardyń boıyna asyl qasıetterdi sińirýimiz qajet. Men zııaly qaýym ókilderiniń bir-birine árdaıym tilektes bolǵanyn qalaımyn. О́zara janashyr bolý – elge janashyr bolý degen sóz. Usaq-túıek áńgimeni qoıyp, qazaqty bólip-jarmaı, jalpyulttyq deńgeıde oılaýǵa umtylaıyq!» degen júrekjardy tilegin baıtaq qazaq dalasyndaǵy kósh bastaǵan el aǵalary uran sekildi qabyldasa degen nıetimdi jetkizgim keledi», dedi depýtat.
Sóz sońynda Janarbek Áshimjan qazaq halqy taǵdyrsheshti sátterde Abaıdyń dana sózderine júginip otyrǵanyn eske saldy.
«Ult zııalylary uly oıshyldyń «Birińdi qazaq, biriń dos, kórmeseń, istiń bári – bos» degen sózin asqan jaýapkershilikpen sezitnetin sát keldi!», dep qorytyndylady J.Áshimjan.