Uly dala tórinde qıly tartysqa toly, keri ketken qıyn kezeńderdiń ótkeni tarıhymyzdan belgili. Sol almaǵaıyp zamanda buqara halyqtyń kúnkórisi men jan amandyǵy jolynda basyn qaýip pen qaterge tikken taý tulǵalarymyz Kúltóbeniń basynda keńes qurǵan. Memleket basshysy ata-baba dástúrin alǵa tartyp, elimizdi jańarý men jańǵyrý jolyna bastap keledi.
Olaı deıtinimiz, Prezıdent Qasym-Jomart Toqaevtyń ult taǵdyryna qatysty keleli máselelerdi uly dalanyń kıeli mekenderine baryp kóterýinde bolyp tur. Memleket basshysynyń el tizginin qolyna alǵannan keıin ótkizgen Ulttyq quryltaıdyń alǵashqy otyrysy kıeli meken Ulytaý tórinde uly tulǵalardy dáripteýden bastalsa, qasıetti Túrkistanda ótken ekinshi otyrysynda tól tarıhymyz ben rýhanı qundylyqtarymyz keńinen tarazylanǵan edi. Al Ulttyq quryltaıdyń Saraıshyq óńirinde ótken kezekti otyrysynda elimizdiń jarqyn bolashaǵyna jol ashatyn bastamalar talqyǵa tústi.
Quryltaı otyrysynda Memleket basshysy: «Ult sapasyn jaqsartamyz desek, bir el bolyp jańa qundylyqtar júıesin qalyptastyrýymyz qajet. Aǵa býyn jas urpaqqa jol nusqap, baǵyt-baǵdar berýi kerek. Elimizde kózi ashyq, kókiregi oıaý, oıy ushqyr, bilimdi jastar kóp. Biz olardyń boıyna asyl qasıetterdi sińirýimiz qajet. Biz bolashaqqa senimmen basý úshin Uly daladaǵy kóshpendiler órkenıetiniń tikeleı murageri retinde mádenı muralarymyzdy saqtap, ulttyq biregeıligimizdi nyǵaıtýymyz qajet. Onyń birden-bir kórinisi – áz Naýryzdyń mártebesin kóterip, mazmunyn baıyta túsýimizden baıqalýǵa tıis», degen edi.
Memleket basshysy aıtyp otyrǵan kózi ashyq, kókiregi oıaý, oıy ushqyr, bilimdi jastar elimizdiń joǵary oqý oryndarynda túrli bilim baǵdarlamalary boıynsha joǵary bilim alyp júr. Iаǵnı joǵary oqý oryndary – jastardy úlken ómirge daıyndaıtyn parasat mektebi. Osy turǵyda Ǵylym jáne joǵary bilim mınıstri Saıasat Nurbektiń tikeleı jetekshiligimen otandyq JOO rektorlary, prorektorlarynyń basqosýyn ótkizý dástúrge aınaldy. Basqosýlarda joǵary oqý ornyndaǵy jalyndy óskeleń jastar sapynan elimizdiń jarqyn bolashaǵyna qyzmet etetin tulǵalardy tárbıeleý máseleleri talqyǵa túsedi. Mınıstrlik tarapynan bekitilgen joǵary oqý oryndaryndaǵy óskeleń jastardy órkenıetke jeteleýdiń 2029 jylǵa deıingi strategııalyq tujyrymdamasy joǵary oqý oryndarynyń jumys tájirıbesinde júzege asyp keledi.
Prezıdenttiń áz Naýryzdyń mártebesin kóterip, mazmunyn baıytý týraly ustanymyna oraı Ǵylym jáne joǵary bilim mınıstrligi otandyq joǵary oqý oryndarynda Ulystyń uly kúni merekesin toılaýdyń onkúndigin joǵary deńgeıde ótkizýdi qolǵa aldy. Kórisý kúninen bastaý alǵan rýhanı tanymy tereń merekemiz Qaıyrymdylyq kúni, Mádenıet jáne ulttyq salt-dástúr kúni, Shańyraq kúni, Ulttyq kıim kúni, Jańarý kúni, Ulttyq sport kúni, Yntymaq kúni, Jyl basy – áz Naýryz merekelerimen astasyp, professor-oqytýshylar quramy men stýdentterdiń rýhanı turǵyda kemeldenýine zor yqpal etip otyr. Osy bastamany rııasyz shyn yqylaspen qabyldaǵan Jumabek Táshenov ýnıversıtetiniń qyzmetkerleri men bilim alýshy jastary ulttyq rýhymyzdyń oıanýyna óz úlesin qosyp júr. Al ýnıversıtetimizdiń basty ustanymy – jastardyń ǵylym, sport, ónerge qyzyǵýshylyǵyn arttyrý arqyly olardyń tulǵalyq qabiletin jan-jaqty damytý, strategııalyq sheshimder qabyldaýǵa baýlý.
Ǵalymjan BITURSYN,
J.Táshenov ýnıversıtetiniń prorektory