Ulystyń uly kúnin Qostanaı qalasynyń turǵyndary da erekshe qýanyshpen toı-dýmandatyp qarsy aldy. Qalanyń ortalyǵynda otyzǵa tarta otaý tigilip, merekelik konsert, ulttyq sport saıystary, qolóner týyndylary men ulttyq taǵamdar festıvali ótti.
Ortalyqqa jınalǵan jurt mereke alańyndaǵy úlken sahnada óner kórsetken óńir ónerpazdarynyń konsertin tamashalady. Aımaq basshysy da oblys turǵyndaryn osy sahnadan quttyqtap, kópshilikke júrekjardy jyly lebizin arnady. «Barshańyzdy jańarý men jasampazdyqtyń bastaýy, yrys pen berekeniń arqaýy – Naýryz meıramymen quttyqtaımyn. Tarıhy tereńde jatqan bul ǵajaıyp mereke jańa ómirdiń bastaýy sanalady. Bul – dastarqanǵa aq tolatyn, elimizge baq qonatyn, berekemiz shalqıtyn kún. Bıyl búkil el bolyp Ulystyń uly kúnin jańasha, erekshe sıpatta atap ótip jatyrmyz. Naýryz elimizdegi jańarý men jańǵyrýdyń basty nyshanyna aınalyp otyr. Berekemiz artyp, qýanysh-shattyǵymyz ortaımasyn, aǵaıyn!», dedi ákim.
Odan keıin merekelik alańnan Qydyr ata bastaǵan tarıh kerýeni júrip ótti. Taıqazan kótergen naızaly jigitter, tazy jetektegen seriler, kúbi pisip, maı shaıqaǵan, tekemet toqyp, kıizge oıý-órnek salyp jatqan qyz-kelinshekter, án salyp, kúı áýeletken dýmanshyl jastar, asyq atqan balalar, teketiresken balýandar, qazaqtyń turmystyq qolóner buıymdaryn ustaǵan arý boıjetkender yǵy-jyǵy alańdy kóneniń kóleńkesinde qalǵan turmys pen mádenıet tarıhynan syr shertken kórkem kórinisterge toltyryp birinen keıin biri tizilip ótip jatty.
Mereke aıasynda ótken «Otaýlar festıvali» de Naýryz toıynyń merekelik mazmunyn ashyp, shyraıyn kirgize túskendeı. Jaǵalaı ornalasqan kıiz úılerdiń ishi quddy bir mýzeı tárizdi, sán-saltanaty birinen biri ótedi. Mysaly, «Bolshevıchka» tigin fabrıkasy aýdany 80 sharshy metr bolatyn 16 qanat kıiz úı tigipti.
«Bul kıiz úıdi Qyrǵyzstannan arnaıy tapsyrys berip aldyrdyq. Aldymen elimizdegi sheberhanalardy aralap kórdik, odan keıin Bishkekke ushyp bardyq. Bizge kórshi eldiń sheberleri usynǵan kıiz unady. Kıiz úıdi úsh kún boıy tiktik», deıdi tigin fabrıkasy dırektorynyń orynbasary Anatolıı Chýıko.
Al «Allur» avtokólik qurastyrý zaýyty turǵyzǵan kıiz úıdiń keregesine LED-ekran ilinipti. Úlken ekrannan kıiz úı jabdyqtary men mashına jasaý zaýytyndaǵy óndiris barysyn tamashalaýǵa bolady. «Biz ótken tarıh pen qazirgi ómirimizdi baılanystyrǵymyz keldi. Kıiz úı – kóshpeli qazaq turmysynyń, al bizdiń avtokólikter búgingi qozǵalystyń nyshany. Sondyqtan bizdiń otaýǵa bas suqqan meımandar LED-ekran arqyly kıiz úı jabdyqtaryn ǵana qyzyqtap qoımaı, zaýytqa vırtýaldy saıahat jasap, óndiris alańdaryndaǵy tehnologııalyq úderistermen, iri jobalarmen tanysa alady», deıdi zaýyt ókilderi.
Mereke barysynda balýandar beldesýi, aýdaryspaq, jilik shaǵý, qoı kóterý, qolkúres, asyq, jamby atý tárizdi ulttyq sport túrleri boıynsha jarystar ótti. Ásirese jergilikti etnomádenı birlestikterdiń atynan on shaqty aspaz qatysqan «Palaýlar álemi» atty baıqaýdy qyzyqtaǵan jurt qarasy kóp boldy. Baıqaý sharty boıynsha aspazdyń sheberligi palaýdyń tez pisýine, sondaı-aq taǵamnyń tábet oıatar hosh ıisi men dámdiligine qaraı baǵalandy.
Qostanaı oblysy