Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary Ekologııa jáne tabıǵı resýrstar mınıstrliginiń basshylyǵymen kezdesti. Memlekettiń «jasyl» ınvestısııany tartýdy kótermeleý men yntalandyrý jáne eń úzdik qoljetimdi tehnıkany keńinen qoldaný sheńberinde QR-nyń Ekologııalyq kodeksin iske asyrý – kún tártibindegi basty másele boldy, dep habarlaıdy Egemen.kz Senattyń baspasóz qyzmetine silteme jasap.
Komıtet tóraǵasy Álı Bektaev Ekologııalyq kodekstiń 2021 jyly qabyldanǵanyn atap ótti. Bul baǵytta birneshe jyl boıy atqarylǵan aýqymdy ister nátıjesinde qujatta úzdik halyqaralyq tájirıbege negizdelgen strategııalyq erejeler toptamasy bekitilgen.
«Ekologııalyq kodekstiń negizgi maqsatynyń biri – qorshaǵan ortaǵa teris áserdi azaıtý. Ol úshin ónerkásiptik kásiporyndardy tehnıkalyq jaǵynan jańǵyrtý kózdelgen. Solardyń biri – eń jaqsy qoljetimdi tehnıkany birte-birte engizý jáne jasyl ınvestısııalardy qoldaý tásilderi qarastyrylǵan. Kodekste bul normalardyń iske asyrylýy kezeń-kezeńmen bekitilgen», dedi Álı Bektaev.
Ekologııa jáne tabıǵı resýrstar mınıstriniń orynbasary Mansur Oshýrbaev óz kezeginde Ekologııalyq kodeks qazirgi zamanǵy ekologııalyq saıasat baǵytyndaǵy mańyzdy qadam ekenin jáne qorshaǵan ortanyń jaı-kúıin jaqsartý men ekologııalyq tepe-teńdikti saqtaýǵa umtylystyń ajyramas bóligi retinde jasyl tehnologııany engizý tetikterin kózdeıtinin atap ótti. Qorshaǵan ortaǵa teris áserdi azaıtý men ekologııalyq jaǵdaıdy jaqsartýdyń tıimdi quraly – eń jaqsy qoljetimdi tehnologııany engizý.
Is-sharaǵa Ekologııa, О́nerkásip jáne qurylys, Ulttyq ekonomıka, Saýda jáne ıntegrasııa mınıstrlikteriniń, Memlekettik kirister komıtetiniń basshylyǵy, sondaı-aq Qazaqstannyń Damý Bankiniń, ǵylymı-zertteý ınstıtýttarynyń ókilderi jáne osy salanyń sarapshylary qatysty.