Abaı oblysy Aıagóz aýdanyndaǵy ózen sýynyń deńgeıi kóterilip ketip, ózen irgesinde ornalasqan Tólendın kóshesindegi 43 jeke turǵyn úıden 172 adam evakýasııalandy, dep habarlaıdy Egemen.kz.
Oblys ákimdiginiń málimdemesinde: «Ýaqytsha orynǵa jetkizýge 3 avtobýs bólindi. Alaıda azamattardyń kóbi týystarynyń úılerine ketti. Qalǵandary mektep-ınternat jataqhanasyna jáne jasósipirimder sport mektebine ornalastyryldy», delingen.
Sonymen qatar Aıagóz ózenine jaqyn Eshmaǵanbetov, Shyńǵoja batyr kósheleri 324 turǵynyna saqtyq sharalaryn saqtaý eskertildi.
«Mamyrsý aýyldyq okrýginde de sý deńgeıi kóterilip, saqtyq sharalaryn saqtaý maqsatynda ózen jaǵasyna jaqyn ornalasqan 10 úıge, (onyń ishinde 30 eresek, 40 bala) eskertý jasaldy. Evakýasııa pýnkti daıyn. Tótenshe jaǵdaı boıynsha shtab qurylyp, kezekshilik uıymdastyrylǵan», delingen habarlamada.