Qazirgi ýaqytta Qarsaqbaı kentindegi sýdyń deńgeıi qalypty. Dese de óńirdegi ahýaldy óz deńgeıinde ustap turý úshin shtab kezekshiligi úzdiksiz jumys istep tur. Bul rette Ulytaý oblysy ákimi Berik Ábdiǵalıuly tarapynan ahýaldy qatań baqylaýda ustaýdan bólek, halyqty aldyn ala habardar etip otyrý jumystary tapsyryldy, dep habarlaıdy Egemen.kz atalǵan oblys ákimdigine silteme jasap.
Aıta ketsek, Qarsaqbaı kentiniń sý toǵany men «Shaýypkel» toǵanynda da sý deńgeıi kóterildi. Saldarynan kenttegi eki avtomobıl ótkeli mańyndaǵy joldy sý basty. Jergilikti ákimdik, memlekettik mekemeler, uıymdar men erikti tulǵalardyń birlese atqarǵan is-shara nátıjesinde turǵyn úılerdi sý basý derekteri tirkelgen joq. Kenttegi toǵanda aǵyndy sýdyń aldyn alý jumystaryna Qarsaqbaı metallýrgııalyq zaýytynyń qyzmetkerleri de tartyldy.
Taǵy bir aıta ketetin jaıt, 28 naýryzda oblys ákimi Berik Ábdiǵalıuly Jezdi kentinde baspanasyn sý basqan azamattarmen kezdesip, shyǵynǵa ushyraǵan otbasylar ýaqytsha oryndarǵa kóshiriletinin, tótenshe jaǵdaı aıasynda qajetti kómek kórsetiletinin jetkizdi.
«Zardap shekken otbasylar túgel qaýipsiz jerge kóshirilsin. Merdiger anyqtalyp, saraptama jasalǵan soń barlyq shyǵyn óteledi», dedi óńir basshysy. Jergilikti atqarýshy organnan 15, Tótenshe jaǵdaılar departamentinen 50-ge jýyq, Polısııa departamentinen 30-dan astam qyzmetker, jalpy sany 13 tehnıka men 3 sorǵy jumys istep jatyr.
Eske salsaq, 28 naýryzǵa qaraǵan túni Ulytaý aýdanyna qarasty Jezdi kentinde 10-ǵa jýyq úıdi sý basqan. Izinshe sol úılerden jáne jaqyn aýmaqtaǵy baspanalardan bas-aıaǵy 26 otbasy evakýasııalandy. Qazirgi ýaqytta kenttiń jataqhanasyna ornalastyrý jumystary júrgizilip jatyr.