Mal súmesimen kún kórgen malsaq qaýym qatal qystyń tezine ázer shydap, áýpirimdep shyqty. Qys ishinde jańbyr jaýyp, onsyz da tar, júdeý jaıylymdaǵy óliqaýǵa aýzy jetpegen jylqy jaryqtyqta shyǵyn kóp. «Jyǵylǵanǵa – judyryq» degendeı, bireýdiń aq adal malyn ońaı olja kóretinder qatary sıremeı tur.
Ereımentaý aýdanynyń polısııa qyzmetkerleri sharýaǵa 8,5 mıllıon teńge shyǵyn keltirgen urylardy ustady. Olar 13 bas jylqy urlaǵan. Tebinde júrgen jylqyny «GAZel» avtokóligine artyp, izderin sýytyp ketpek bolǵan. Polısııa qyzmetkerleriniń jedel iz kesip, shıraq qımyldaǵandarynyń arqasynda urylar qolǵa tústi. 11 bas jylqy ıelerine qaıtaryldy. Az ǵana ýaqyttyń ishinde baýkespeler semiz eki jylqyny soıyp, satyp úlgergen. Qazir bul is boıynsha sotqa deıingi tergeý amaldary júrgizilip jatyr.
Ońaı oljaǵa qunyqqandar bir bul emes. Bul taraptaǵy zań qataıyp, jaza aýyrlaǵanymen, «dándegen qarsaq qulaǵymen in qazady» degendeı, sharýanyń aqadal malyn ıesi joq dúnıedeı kóretinder ókinishke qaraı kezdesip qalady. Taıaýda taǵy bir urlyq áshkere boldy. Bul joly urylar eki jylqyny qoldy qylǵan. Mal ıesine kelgen shyǵyn 800 myń teńgeniń kóleminde.
Bul qylmysqa qatysy barlardyń ústinen is qozǵalyp, buryn-sońdy osy tóńirekte tirkelgen mal urlyǵyna qatysy bar-joǵy tekserilip jatyr. Obal degen uǵymnyń dıdary ońsa, jan-jaǵyn omyra oqsatatyndar bas kótermek. Áıtse de, baýkespege buǵalyq salatyn quqyq qorǵaý organdarynyń qyzmetkerleri el aqysyn jibermeýge tyrysady. Qorǵan bolmaq. Eń úlken qorǵan árkimniń ar-uıaty shyǵar, bálkim.
Aqmola oblysy