Bangkokqa baratyndar elordada anyqtalady

Joǵarydaǵy áńgimeniń 57 kg salmaq dárejesinde óner kórsetip júrgen burym­dylarǵa esh qatysy joq. О́ıtkeni bul sal­maqtyń úzdigi áldeqashan anyq­talyp qoıǵan. Tarqatyp aıtsaq, byltyr Qytaıdyń Hanchjoý qalasynda alaýy tutanǵan jazǵy Azııa oıyndarynda Karına Ibragımova kúmis medaldy moınyna ilip, Parıj Olımpıadasynyń joldamasyn ıelendi. Bıyl naýryz aıynyń basynda Italııanyń Býsto-Arsısıo qala­syndaǵy irikteý synynda bes boks­shy baq synaǵan edi. О́kinishke qaraı, jerlesterimizdiń barlyǵy da atalǵan jarysta jeńilistiń kermek dámin tatyp, elge quralaqan oraldy.

Jalpy, elimizdiń áıelder boksy jó­ninde jaǵymsyz áńgimeler buǵan deıin de jıi aıtylyp júrgen. Apennın tú­begindegi sátsizdikten keıin alyp-qashpa sózder, tipten órshı tústi. Bul áńgimeniń barlyǵy da «Tóreshiler bura tartýdan arlanbaıdy. Jeńip tur­sań da, jeńisti bermeıdi», «Ulttyq qurama bapkerleri mańyzdy básekelerge ózderiniń tól shákirtteri men kóńili tús­ken bylǵary qolǵap sheberlerin ǵana aparady, basqalarymyz tasada qa­lyp qoıamyz», «Ádildik talap etseń, basyń pálege qalady. Ondaı jaǵdaıda ne jarystan shettetedi, ne komandadan qýylasyń» degenge saıady. Al ol az deseńizder, tanymal boksshy Angelına Lýkas «Qurama sapyndaǵy keıbir qyz­dar múldem rejim saqtamaıdy. Oqý-jattyǵý jıyny kezinde olar tyǵylyp qorqor shegedi, ishimdik ishedi», dep aıdy aspanǵa bir-aq shyǵardy. Shyny kerek, biz bul áńgimelerdiń qaısysy ras, qaısysy ótirik ekenin bilmeımiz. Biraq bir biletinimiz, búginde elimizdiń áıelder boksy qatty quldyraǵan. Alysqa barmaı-aq, byltyrǵy Azııa oıyndary men taıaý­da ǵana ótken lısenzııalyq týrnırdiń nátıjesine zer salsaq, kóp nársege kóz jetkizemiz.

Sheginerge jol qalmaǵannan soń, ulttyq kuramanyń bas bapkeri Shámil Sa­fıýllın QBF basshylarymen aqyldasa otyryp, 8-10 sáýir aralyǵynda Astanada sparrıng ótkizýdi jón kórdi. Osy synaqqa shaqyrtý alǵandar arasynda Angelına Lýkas pen Balaýsa Muzdıman da bar. Kezinde olar ulttyq qurama sapynda tabysty óner kórsetti. Biraq esimderi atalǵan burymdylardyń baıraqty básekelerge qatysqan kezderi tym sırek. Olar únemi tasada qalyp júrdi. Tózimi taýsylǵannan keıin qos arý kásipqoı rıngte judyryqtasýdy qup kórdi. Ázirge ekeýiniń de «shabysy» shıraq. Lýkas pen Muzdıman óreli ónerimen jankúıerlerin qýantyp júr. Osy jaıttyń barlyǵyn oı eleginen ótkizip, aqyl tarazysyna salǵannan keıin bapkerler olarǵa taǵy bir múmkindik berdi. О́ıtkeni senim artqan sportshylar syn saǵatta súrinip júr. Olardy almastyratyn jalyndy jastar joqtyń qasy. Sóıtip, 54 kg sal­maqtaǵylardyń sparrınginde Ange­lına pen Balaýsadan bólek, Jaına Sheker­bekova, Ánel Saqysh, Elına Bazarova, Uljan Sársenbek, Symbat Álıasqar syn­dy sportshylar baq synaıdy.

50 kg salmaqta eki úmitker bar. Olar – Nazym Qyzaıbaı men Alýa Balqybekova. Ekeýi de – tájirıbeleri ábden tolysqan, ataqtary alysqa jaıylǵan saqa sportshylar. Atap aıtsaq, Nazym – álemniń eki dúrkin chempıony, qurlyq birinshiliginiń jeńimpazy. Alýa da Azııada aldyna jan salmaı, dúnıejúzilik dodada eki ret júl­degerler qataryna qosyldy. 66 kg sal­maq dárejesinde Darıǵa Shákimova, Natalıa Bogdanova, Laýra Esenkeldi, Jas­mın Qızatova kúsh synasady. 75 kg salmaqta Gúlsaıa Erjanova, Valentına Hal­zova, Jibek Jarasqyzy sheberlik baı­qasady. Solardyń arasynan sýyrylyp shyqqandary Bangkoktaǵy lısenzııalyq týrnırge qatysady. Al Taı elinde baǵy janǵan boksshylar Parıj Olımpıadasynda óner kórsetý múmkindigine ıe bolady.

Osy oraıda Astanada kúsh synasa­tyndar tiziminde 60 kg salmaqtaǵy boks­shylardyń joq ekenin de aıta ketýge tıispiz. Sebebi Italııadaǵy jarysta joldamaǵa qolsozym qalǵanda súringen Rımma Volosenkonyń jaraqaty bar. Qazir ol sonyń álegimen júr. Elishilik ja­rystarda oǵan Vıktorııa Grafeeva ǵana qarsylyq kórsete alady. Biraq bap­kerlerdiń paıymdaýynsha, Rımmanyń sheberlik deńgeıi Vıktorııadan edáýir joǵary. Sol sebepti bul salmaqta sparrıng ótpeıdi. Al Bangkokqa kimniń baratyny oqý-jattyǵý jıyny barysynda anyqtalady.